Online sabong gironda (Sabong News)
Author
Camille Pateres
Date
DECEMBER 17 2018
CEBU, Philippines — Dul-an 40 ka tawo ang gidakop sa kapolisan tungod sa matud pa ilegal nga “online sabong” diha sa Barangay Simala, sa Lungsod sa Sibonga niadtong Sabado sa gabii.
Ang mga operatiba sa Criminal Investigation and Detection Group-7 midakop sa tulo ka mga tellers nga silang: Abby Cubar Calilitan, 35, residente sa Masbate City; Shanaia Ibasan Lomogda,19, taga Silay, Negros Occidental; ug si John Piator Casana, 23, taga Alcoy, Cebu. Lakip sab nga gisikop ang cashier niini nga si Kim Pagapolan Fosagate, 22, lumad nga taga Mindanao. Samtang giapil usab og sikop ang 35 ka tawo nga giingong namusta sa maong sugal. Nakuha sa maong operasyon ang upat ka telebisyon; upat ka mga PC monitors; walo ka mga printers; upat ka mga Central Processing Units; pito ka mga routers; upat ka adapters; mga bet receipts; ug ang bet money nga mokabat ngadto sa P3,300.
Si CIDG-7 Deputy Regional Chief Police Chief Inspector Hector Amancia mibutyag nga illegal ang maong paagi sa pagsugal sanglit gipaagi kini sa online.
Matud niya nga sa ilang gihimong surveillance, nasuta nga kinahanglan mosulod og betting platform ang mamusta ug sa pagabot sa maong lugar, hatagan sila og betting website diin didto na ibutang kun pila ang ilang ipusta. “Kung ako sad bettor outside, pwede ra mosulod sa website pwede na ko mo pledge sa akong bet didto, what makes it illegal kay what the law requires kanang gi allow lang sa munisipyo para mo-issue og permit base sa PD 449 kanang traditional cockfighting gyud,” si Amancia nagkanayon.
Dugang ni Amancia nga posible nga usa ka dakong gambling lord ang nanagiya sa maong gitawag nila nga “online sabong” nunot sa ka hi-tech sa mga nakompiska nga mga ebidensya. Apan ang abogado sa maong pasugalan nga si Attorney Julius Ceasar Entise mipadayag sa Banat News nga legal ang maong gambling operation sanglit aduna silay mga permits ug dokumento nga makasuporta sa ilang operasyon.
Lakip na niini ang ordinansa sa Munisipalidad sa Sibonga nga giaprubahan pa sa Provincial Board sa Sugbo nga nagtugot sa maong matang sa pagsugal.
Gitin-aw sab ni Entise nga dili online betting ang sistema sa ilang sugal apan usa kini ka offsite cockpit betting diin i-live broadcast ang sabong nga nahitabo sa laing cockpit arena sa Sibonga. “We get live video broadcasted in Sibonga. It is just an innovation of a traditional cockfighting. It is televised, no actual cockfighting on site,” si Entise miingon. Butyag sa maong abogado nga adto mobayad ug mokobra sa cashier ang mga motaya sa ilang pusta ingon man sa ilang daog.
“There is no website. I don’t think they did surveillance but if they did, they should check if the information is correct probably tsismis ra nang naa nila,” Entise miingon.
Masaligon ang kampo nilang Entise nga mabasura ra ang maong kaso.
