Gigamit balaud sa sabong sayop (Sabong News)
Author
Gregg M. Rubio
Date
AUGUST 19 2019
CEBU, Philippines — Sayop ang gigamit sa mga awtoridad nga balaud sa pagronda sa usa ka bwangan sa Dakbayan sa Mandaue diin 370 ka sabungero ug mga kawani ang nangasikop.
Kini ang gipadayag ni Ako Bisayas Party List Congressman Sonny Lagon kinsa tinahud ug ilado nga sabungero sa nasud.
Matud ni Lagon nga ang gipasikaran nga Presidential Decree 449 o ang Cockfighting Law of 1974 nasapawan na sa PD 1802-A nga naghatag og gahum sa mga lokal nga kagamhanan sa pag-regulate sa sa regular cockfighting.
Ang PD 449 giluwatan ni Presidente Ferdinand Marcos atol sa Martial Law diin ang gahum sa pag-regulate sa sabong gihatag ngadto sa Philippine Constabulary nga dugay na nga gipapas.
Niadtong Enero 16, 1981, si Marcos niluwat sa PD 1802 diin ang Philippine Gamefowl Commission gitahasan sa pagtan-aw sa international derbies samtang sa samang adlaw giluwatan ang PD 1802-A diin ang bugtong probisyon mao ang paghatag og gahum sa lokal nga kagamhanan sa pag-regulate sa regular cockfight.
“From these premises, it is therefore unmistakable that PD 449 can no longer be enforced as it was already superseded by PD 1802-A and the Local Government Code,” matud ni Lagon.
Nakapangutana usab si Lagon kung nganong sa Cebu ug Central Visayas lang gipatuman ang PD 449 nga mismo sa Davao City wala kini gipatuman.
Gipasabot usab ni Lagon nga subay sa balaud dili lang adlawng Domingo ang sabong sanglit magdepende kini sa demand.
Wala hinoon gibasol ni Lagon ang mga awtoridad nga nihimo sa pagpangronda sanglit igo lang kini nagtuman sa ilang trabaho.
“Looy pud and mga pobre nga nanginabuhi sa cockfighting industry sama sa mga kuyme, mananari, masyador, mananahi, mga gagmay nga negosyante nga naninda sa mga bwangan, mga empleyado sa mga bwangan ug mga kompanya nga nag-manufacure og feeds and veterinaryproducts. Daghan kaayo ang apektado kung mamatay ang gamefowl industry,” matud ni Lagon.
Si Lagon niduso sa House Bill 2625 aron pag-usab sa mga karaan nga probisyon sa balaud sa sabong aron mapapas ang kalibog kabahin niini.
“We must acknowledge that sabong is a part of the Filipino’s identity and way of life. We have inherited it from our forefathers and now, it has become a significant contributor to the national economy. We need to protect the industry for the benefit of all stakeholders especially those who entirely rely on it for their livelihood. Of equal importance is the task of installing standards to prevent abuse and ensure that the government gets its fair share,” concluded the renowned cockfighting aficionado and champion breeder.
