EDITORYAL - Basura sa estero, malaking problema (Sabong News)
ISA sa adbokasiya nang ni-reject na DENR secretary Gina Lopez ay ang linisin ang mga estero sa Metro Manila at iba pang daluyan ng tubig sa bansa. Bago siya ini-apppoint ni Pres. Rodrigo Duterte noong nakaraang taon, marami na siyang nalinis na estero sa Maynila. Ngayong ni-reject siya ng mga miyembro ng Commission on Appointment (CA), maaaring balikan niya ang paglilinis sa mga ilog na dinumihan ng tao at mga pabrika.
Maaaring madismaya si Lopez kapag nakita niya ang mga basurang lulutang-lutang sa estero ngayon. Wala pa ring disiplina ang mga nakatira sa gilid ng estero at mga ilog sapagkat tapon lang sila nang tapon. Sa kabila ng mga paalala na huwag magtatapon ng basura, patuloy pa rin sa ginagawa at walang pakialam magbaha man sa Metro Manila. Wala rin namang ginagawang aksiyon ang mga pinuno ng barangay para mapangalagaan ang mga ilog at estero. Hindi na nila mino-monitor kung malinis pa ang mga estero na nasa kanilang hurisdiksiyon.
Sabi ng Metro Manila Development Authority (MMDA), may pananagutan ang mga barangay captain na maging malinis ang mga estero na nasa kanilang nasasakupan. Masasampahan sila ng kaso sa Ombudsman kapag pinabayaan nilang marumi ang mga estero. Kailangang mapanatili nilang walang basura ang mga daanan ng tubig.
Noong Marso 1, sinimulang linisin ng MMDA ang may 27 waterways sa Metro Manila. At nakagugulat kung gaano karaming basura ang kanilang nakuha sa mga estero. Umabot na sa 685 na trak ng basura ang kanilang nakuha. Ang paglilinis sa mga estero ay bilang paghahanda sa darating na tag-ulan.
Karaniwang mga styropor na galing sa mga fastfood chain ang nakuha sa mga estero. Ang mga basurang ito ay hindi natutunaw kaya magbabara sa mga daanan ng tubig. Iba pang basura na nakuha ay ang plastic na supot mula sa mga malalaking malls. May sirang sopa, crib ng sanggol, sachet na kape, shampoo, sabong panlaba at iba pang plastic products na hindi natutunaw.
Sana, maituloy ni Lopez ang adbokasiyang pagli-linis sa mga estero at makatulong niya ang MMDA at ibang sibikong grupo para mapangalagaan ang mga daluyan ng tubig. Hindi dapat balewalain ang problemang basura sapagkat ito magpapabaha sa Metro Manila.
