CCPO maniid sa mga buwangan kun mabalik na ilang operasyon (Sabong News)
Author
Rowena D. Capistrano
Date
MARCH 10 2021
CEBU, Philippines — Mouyon ra ang Cebu City Police Office Director Police kun mahinayon ang pagpabalik sa operasyon sa mga legal nga buwangan sa siyudad sa Sugbo kun may pagtugot kini sa Inter-Agency Task Force.
Si Police Col. Josefino Ligan, pangulo sa CCPO miingon nga kinahanglan lang nga mosunod ang tanan sa pagtuman sa minimum health standards ug health protocols ug kini ilang sigurohon pinaagi sa pagpaniid.
Nagtuo si Ligan nga makatabang kining mga buwangan sa panginabuhian sa uban nga nagsalig sa sabong ug sa samang higayon makakolekta og buhis ang siyudad gikan niini.
Giawhag niya ang mga mahiligon sa sabong nga dili na magtigbakay nga illegal nga matang sa pagpanari sa manok.
Mas maayong adto nalang gyud sa mga legal nga buwangan kun tugotan na kini sa IATF.
Apan bisan pa og mobalik na ang operasyon sa mga buwangan, mipasidaan si Ligan nga magpadayon ang ilang operasyon batok sa mga tigbakayan diha sa kabarangayan.
