370 ka sabongero nangasikop (Sabong News)
Author
Iris Hazel Mascardo
Date
AUGUST 07 2019
CEBU, Philippines –Moabot sa 370 ka sabongero ang gidakop sa mga sakop sa Criminal Investigation and Detection Group 7 niadtong Lunes sa gabii sa buwangan sa Barangay Ibabao-Estancia, Dakbayan sa Mandaue.
Kini human giingong ang buwangan nagpahigayon og sabong sa manok sa adlaw nga wala gitugot sa Presidential Decree 449.
“May complaint yan from concern citizen, then nakarating yan sa Kampo Crame, yung letter, and din yung chief PNP, pinasa naman sa CIDG tapos kami ang nag-implement nito kung ano yung complaint,” matud ni ni CIDG Mandaue City chief, Police Major Edwin Lacostales.
Sumala pa nga gipasidan-an na ang tagdumala sa buwangan apan nitubag nga dunay ordinansa nga nagtugot sa sabong sa maong adlaw.
Ang maong buwangan legal ang operasyon sanglit aduna man kini permit apan nagtugot lang kini sa adlaw nga Domingo ug piyesta opisyal o holiday.
Apan bisan adunay valid permit ang maong buwangan ug may ordinansa alang niini, gipatin-aw ni Lacostales nga ang ilang gipatuman mao ang nasudnong balaud.
Gitun-an pa sa CIDG kung pasakaan ba og kaso ang tag-iya sa maong buwangan.
Samtang ang mga tawo nga nasikop nanagreklamo tungod kay wala silay kaon sulod sa pipila ka oras gikan sa ilang pagkasikop hangtud kagahapon sa buntag.
Nagpunsisok ang tanan sa nataran sa Camp Sotero Cabahug samtang naghuwat sa mando kay dili pa sila pwede makapiyansa tungod kay holiday kagahapon.
Ang lokal nga kagamhanan sa Dakbayan sa Mandaue nagpadala og pagkaon kagahapon sa udto alang sa mga nangasikop samtang ang uban gihatdan sa ilang pamilya. (Romeo T. Limpangog/GMR)(BANAT NEWS)
