Abogado, konsehal sikop sa tigbakay (Sabong News)
Author
Iris Hazel M. Mascardo
Date
JANUARY 18 2021
CEBU, Philippines — Siyam ka tawo lakip ang magsuon nga usa ka abogado ug usa ka konsehal sa lungsod ang gipangdakop tungod sa ilegal nga tigbakay sa Sitio Matnog, Barangay Putat, Tuburan niadtong Biyernes.
Ang mga nasikop giila nga sila si Atty. Renan dela Cerna, 45, legal officer sa Lungsod sa Tuburan ug igsuon niini nga si Konsehal Arbello dela Cerna, 51, sa maong lungsod.
Laing nasikop mao sila si Alexandee Mangubat, 62; Antonio Caray, 57; Ananias Talaugon, 57; Jesus Sinaloba, 66; Santiago Talaugon, 55; Allan Mondejar, 54 ug Edger Arnoco, 51. Matud ni Police Lt. Colonel Rolando Barraquio, hepe sa Tuburan Municipal Police Station, nga hiniusang operasyon ang gihimo sa Criminal Investigation and Detective Group (CIDG) Cebu Province diin ang ilegal nga kalihukan gipanid-an na kini sulod sa pipila ka semana.
“Matagal na surveillance talaga ang ginawa dyan of the CIDG and they have positive information na hindi lang isang beses medyo matagal nang nangyayaring cockfighting doon sa lugar,” sigun ni Barraquio. Dugang pa niya nga sa operasyon, adunay sobra sa 200 ka tawo sa tigbakay. Pag-abot sa mga awtoridad aron sa pagdakop, kadaghanan kanila nakaikyas sa lainlaing direksyon.
“Ang nahuli is siyam, including yung municipal councilor at yung attorney,” matud ni Barraquio.
Matud ni Barraquio nga ang lugar diin gidakop ang mga sugarol gitukod aron mahimong alternatibong lugar diin sagad himuon ang sabong.
“Seguro ginagawa nilang practisan ng mga manok din nila,” matud ni Barraquio.
Sa pagkakaron, matud ni Barraquio nga dili pa nila matino kung kinsa ang mga nag-organisar sa maong nga ilegal nga sabong.
“Di rin siya magiging legal kasi violation kasi nga sobrang daming tao at saka maliit yung lugar, more or less 200, nagtakbuhan sila,” sumala pa ni Barraquio. Ang CIDG-Cebu mopasaka og kasong kalapasan sa Presidential Decree 449 nga giamendar sa PD 1602 o ang balaud sa tigbakay.
