PNP: Tigbakay atol sa Semana Santa gipanglantawan (Sabong News)
Author
Gabriel C. Bonjoc
Date
APRIL 14 2019
CEBU, Philippines — Gipanglantawan na sa kapolisan sa Siyudad sa Talisay ang posibilidad nga daghan ang magpahigayon og tigbakay atol sa Semana Santa.
Si Chief Inspector Ardeolito Cabagnot, deputy chief sa Talisay City Police Station nagkanayon nga mopahigayon sila og operasyon batok sa mga sugarol diin pangsikopon nila kini.
Matud ni Cabagnot nga naandan na gyud ang sabong sa manok apan ilegal kini hinungdan nga sikopon gyud nila ang mga sugarol niini.
Hinuon kadtong nagpahigayon sa tigbakay nga adunay nakuhang permit gikan sa city hall o Kapitolyo dili sila moronda niini.
“Gi-take advantage man gud ni sa mga sugarol ang higayon nga walay trabaho ang mga tawo”, matud ni Cabagnot.
Si Cabagnot nagkanayon nga padayon ang ilang hugtanong paggukod sa mga ilegal ilabi na sa ginadiling drugas.
Si Cabagnot niawhag sa mga tawo ilabi na sa mga nagplanong magsugal nga unta igahin ang ilang panahon sa pagpenetensiya uban sa ilang pamilya kay kong magsugal sila ug masikop adto na unya kini magsaulog sa Semana Santa sa prisohan.
