Drug matrix ni ygot (Sabong News)

CEBU, Philippines — Daghang inilang mga drug lords sa rehiyon ang naligsan ug napahilom sa gipakusgang kampanya kontra ilegal nga drugas sama nilang Jeffrey “Jaguar” Diaz ug Rowen “Yawa” Secretaria ug uban pang konektado sa ilang grupo. Mitahan sab ang miangkong druglord nga si Franz Sabalones atol pa lang sa unang tuig sa paglingkod ni Pres. Duterte. Sa rekord sa Philippine National Police gikan sa Hulyo 1,2016 hangtud sa Enero 31, 2019, duna nay 5,176 nga napatay ug 170,689 ang napriso sa war on drugs. Apan wala mohubas ang shabu sa Sugbo ug kinilo na hinuon ang nangasakmit. Ang binilanggo sa New Bilibid Prisons nga si Rustico Ygot maoy gitumbok nga hinungdan. Si Ygot nga gamay lang nga drug pusher kaniadto, mao karoy gitumbok nga nipuli sa mga nangahagbang druglords pinaagi sa pagtukod og kaugalingong drug network. Base sa nakuhang dokumento sa Banat News sa drug matrix ni Ygot may tulo ka aktibong polis ug usa ka sakop sa Philippine Coastguard sa iyang grupo. Nasubay sa Police Regional Office 7- Regional Intelligence Division nga kanhi kapuyo ni Ygot si Jocelyn Encila, ang gikatahong drug queen sa Sugbo. Siya maoy direct contact ni Ygot ug tigdawat sa shabu dinhi gikan sa Luzon ug Mindanao. Apan nabisto kini dihang nadakpan si Elymar Ancajas sa buy bust operation didto sa Barangay Inayawan sa Dakbayan sa Sugbo nga nakuhaan og 18 ka kilong shabu. Mitug-an si Ancajas sa kapolisan nga gikan ni Encila ang maong shabu. Apil sab maong matrix ang ig-agaw niini nga aktibong polis nga nadestino sa Bohol Provincial Police Office nga taga Barangay Tangke, Dakbayan sa Talisay. Gibutyag sab sa kapolisan gawas ni Ygot, may mga alagad sa gobiyerno nga nakarelasyon si Encila nga nahimo niining protektor. Matud pa nga niadtong 2003, nakarelasyon ni Encila ang usa ka intelligence officer sa Coastguard diin nagkaanak sila og tulo. Human nila, nakarelasyon sab si Encila ang usa ka Police Officer 3 nga nadestino karon sa Cebu City Police Office. Pagkabuwag sa duha, nakarelasyon sab ni Encila ang usa ka Jake Arglo Garces, usa ka big time drug lord nga kauban ni Ygot sa New Bilibid Prison. Si Garces nakombikto sa kasong murder. Matud pa nga si Garces gisuplayan sab ni Ygot og shabu ug gituohang aduna sab kini kaugalingong grupo. Adunay usa ka anak si Jocelyn ug Garces. Tuig 2016 gituohang nakarelasyon ni Encila ug ang usa ka aktibong polis nga nadestino sa Personnel Holding and Accounting Unit. Apan sa dihang nadakpan si Encila, wala na kini mo-report sa trabaho kay nag-AWOL. Matud pa nga dunay mga hulagway sa duha nga naguban sa mga bakasyon ug mga selebrasyon sa pamilya. Ang maong polis giingong nahilig sab sa sugal ug gani sa background investigation sa PRO7 samtang anaa pa kini sa Regional Public Safety Battalion-7 niadtong 2013, nalambigit na kini og illegal nga sabong didto sa Sibonga. Sa pagdestino kaniya sa CCPO isip traffic officer anang tuiga nabarkada nini si Jinnefer ‘Efer’ Mercader, kanhi barangay kapitan sa barangay Lugo sa lungsod sa Borbon nga gikatahapang hitman sa mga politiko. Si Mercader nadakpan tungod sa kaso sa ilegal nga drugas ug paghupot og mga ilegal nga armas apan nakaeskapo sa Medellin District Jail niadtong Marso 5, duha ka adlaw human nadakpan si Encila. Hangtud karon wala pa gihapon makit-i si Mercader. Matud sa direktor sa PRO-7 nga si Chief Superintendent Debold Sinas, ‘armed and dangerous’ kini. Giingong kauban ni Mercader si Wilfred Cabillo, usa ka kanhi polis nga nadakpan na niadtong Septiyembre 12,2017 pinasikad sa warrant of arrest sa kaso sa ilegal nga drugas. Sa wala pa naaresto si Cabillo na-dismiss na siya sa serbisyo tungod sa grave neglect of duty. Si Cabillo ug ang nag-AWOL nga polis nga hinigugma ni Encila giingong classmates sa PNP Regional Training Center-7 niadtong tuig 2017. Sigun pa sa hepe sa PRO7-RID nga si Senior Superintendent Remos Medina nga ang grupo ni Ygot nakabaligya og 300 ka kilong shabu nga mobalor og P2.4 bilyones sa wala pa sila mabulabog. Nabulabog sila dihang nadakpan si Charlie Fortuna niadtong Pebrero 8 ning tuiga sa usa ka subdivision sa Barangay Cubacub, Dakbayan sa Mandaue kinsa nakuhaan og P47.6 milyones nga shabu. Ang “blue book” nga nakuha gikan kang Fortuna nag-ingon nga gikan ang shabu niini kang Ancajas. Naka-rekord sab didto nga nakabaligya si Fortuna og 300 ka kilong shabu nianang semanaha. “Ang dami na nilang nasira na kinabukasan. Just imagine na 300 kilograms? That’s why we are looking out for them. We will continue to be relentless in our campaign,” sigun ni Medina kinsa nagtuong gikan sa Ozamis City ang maong mga ilegal nga drugas. Wala pa matumbok kun apil ba ang mga Parojinog sa grupo ni Ygot. Si Sinas miingon nga makonsiderar nga mga bag-ong drug players sa Sugbo ang grupo ni Ygot maong wala sa ilang drug watchlist silang Jocelyn ug ang manghud niini nga si Janelyn nga gipatay sa mga armadong lalaki didto sa Mandaue City sa miaging semana. Ang direktor sa Mandaue City Police Office nga si Police Senior Superintendent Julian Entoma mibutyag nga si Janelyn maoy tig-remit sa kwartang halin sa ilegal nga drugas sa ilang grupo. Usa ka adlaw sa wa pa gipatay si Janelyn, miduol kini sa kapolisan kay nahadlok nunot sa wala mailhing mga tawo nga nagsunod-sunod kaniya human nadakpan iyang maguwang nga si Jocelyn. Nagduda ni Entoma nga gipatay si Janelyn kay nikooperar na kini sa mga polis.