Yon tenk, Ada trucking midaog dayon (Sabong News)
CEBU, Philippines - Gisugat og daog ang Team Oho-Ada Trucking ug Yon Tenk pagsugod sa aksiyon sa labing unang Grand Tejero Ballclub ‘Grand Arena Cup’ niadtong Lunes didto sa Barangay Hipodromo gym, dakbayan sa Sugbo.
Ang Ada Trucking yano kaayong mikulit og daog human nila gilubong ang Baby Maximus, 111-98, samtang ang Yon Tenk maka-eskapo bitbit ang 104-103 nga kadaugan batok sa Sabong sa Sugbo.
Si Ting Gelig mikadlit og 18 puntos aron mangu sa balanseng opensa sa Ada Trucking, samtang laing unom niya ka teammates ang miiskor sab og double digits. Si Philip Galan mirehistro og 16 puntos, gisundan ni Ada Ladena sa iyang 14 puntos ug JayR Pagasajo nga adunay 12 puntos. Sila si Henrich Canencia, Batoy Cañete ug Rene Rodrigo parehong miantog og 10 puntos aron tabangan ang Ada Trucking nga mohakot og daog.
Miiskor unta og 25 puntos si Mark Curray alang sa Baby Maximus, apan nakawang lang kay kuwang siya og maayong suporta gikan sa iyang kaubanan kay si Mart Gelbolingo mao lang ang ikaduhang player nga miamot og double figures sa iyang 10 puntos.
Sa laing bahin, ang Yon Tenk kinahanglan pa nga molabang sa lawod sa kalisdanan una nila maangkon ang makutas nga daog.
Sikit kaayo ang ilang duwa sa fourth quarter ug himalatyong segundos na matino ang kadaugan sa Yon Tenk.
Gipangulohan ni Z. King ang kadaugan pinaagi sa iyang makabungog nga 28 puntos, gisundan sa ilang team owner nga si Yon Tenk nga adunay 18 puntos.
Lima ka players ang miiskor og double-figures alang sa nabihag nga Sabong sa Sugbo.
Ang liga nga gipaluyohan ni Nonoy Chiongbian, gidumala ni commissioner Pompe Gabuya ug deputy commissioner Rhaylee Bontuyan.
