Pamilya ng nawawalang sabungeros, dismayado (Sabong News)
Author
Bening Batuigas
Date
OCTOBER 22 2022
Mukhang inaalat si Justice Sec. Jesus Crispin Remulla. Noong Martes ay nagulantang ang mga sumusubaybay sa pagpatay kay Percy Lapid matapos mabalita na namatay ang isa sa itinuturong middleman nang sumukong gunman na si Joel Escorial noong Huwebes.
Ayon kay Escorial binayaran sila ng P550,000 para patayin si Lapid na ang inginuso nga nito ay itong isang inmate na si Villamor. Halos magkakasunod na oras lamang noong October 18 ang pagsuko ni Escorial sa kapulisan sa takot na may masamang mangyari sa kanyang buhay, kaya personal na ihinarap pa ni DILG Sec. Benhur Abalos sa media conference.
Wala pang binanggit kung kanino mapupunta ang P6.5 milyon na pabuya sa paglutang ni Escorial dahil sumuko nga ito. Subalit inaalat nga ang napipintong pagkatukoy sa master mind sa pagpatay kay Lapid dahil patay na pala ang inginuso ni Escorial na middleman.
Nangangamba ang pamilya ni Lapid sa pangunguna ni Roy Mabasa na matutumbok na ang katotohanan at hustisya sa kanyang kapatid. Kaya tuloy nagpahayag si Mabasa na siyasatin na lamang ang bank account ni Escorial upang matukoy kung sinu-sino ang nag-deposit sa account ng gunman. Iyan ngayon ang tinututukan ng pamilya nina Roy Mabasa. Buo ang tiwala nila sa pahayag ni Sec. Remulla na bibigyan ng proteksyon ang middleman upang madaling matukoy kung sinu-sino pa ang nasa likod ng pagpaslang kay Lapid.
Pero noong Oktubre 20, naibulalas na lamang ni Sec. Remulla ang pagkamatay ni Villamor ng ma-ambush interviews ito ng media. Kaya nanlumo si Roy Mabasa sa balita na kinumpirma nga na patay na si Villamor. Subalit umaasa itong mga sumusubaybay sa kaso ni Lapid na mabibigyan pa rin ng hustisya matapos magpahayag si SPD director BGen. Kirby Kraft na may isa pang inmate sa Bureau of Correction ang binigyan ng proteksyon dahil tumatayo rin itong middleman sa pagpaslang kay Lapid.
Samantala, dismayado ang mga pamilya ng 34 na nawawalang sabungeros sa napipintong pagbubukas ng e-sabong sa Nobyembre. Ayon sa balita, hindi sila kumbinsido na tila maliliit na e-sabong ang puntirya ni Remulla pero tahimik pagdating kay Atong Ang, bakit kaya? Friends ba sila ni Gretchen?
Tila pagdating sa usapin ng POGO sa bansa, mapupuna na di-nakikialam si Remulla. Dahil ba sa malawak na lupain sa Cavite ay nabili upang gawing POGO? May katotohanan kaya itong isinisiwalat ng ilang pamilya ng nawawalang sabungeros? Tama na sitahin ang e-sabong, lalo na ang WPC ni Atong na tila magsisimula kahit ang kaso ng nawawalang mga sabungeros ay nakabinbin pa rin.
Matatandaan na naaresto ang anak ni Remulla matapos tanggapin ang milyong pisong halaga ng high grade marijuana o Kush na galing U.S.
Nagpahayag naman si Remulla na hindi siya makikialam sa kahahantungan ng kaso ng kanyang anak.
Abangan ang susunod na kabanata.
