E-sabong, magbubukas sa Nobyembre 6 (Sabong News)
Author
Bening Batuigas
Date
OCTOBER 18 2022
NOONG nakaraang linggo, nagbunyi ang mga pamilya ng nawawalang sabungeros matapos mabalitaan na may natukoy na mga cell phone na pag-aari ng mga nawawalang sabungeros at kasalukuyang pinadalhan na nang-subpoena ng kapulisan. Kaya naman umaasa ang mga pamilya ng 34 sabungeros na magkakaroon na ng resulta para mahanap ang kanilang mga kaanak. May ilan pa nga ang umaasa na buhay pa ang mga ito at oras na maibalik ito sa kanilang pamilya, hindi na maghahabol pa.
Sabi ng PNP, mabibigyan na ng linaw ang mga nawawalang sabungeros kapag lumutang sa kanilang himpilan ang mga gumagamit ng mga cell phone ng mga nawawalang sabungeros. Kung sabagay hindi ito imposible dahil sa advance technology ngayon.
Subalit nadismaya ang mga kaanak ng 34 sabungeros nang kumalat ang balitang magbubukas na naman ang e-sabong. Diyos ko po! Magsisimula na raw sa Nobyembre 6. Muli na namang bubulusok si AA sa e-sabong. Sa tingin ng mga pamilya ng nawawalang sabungeros kung noon ay ‘diumubra kay ex-President Digong ang pamamayagpag ni AA, sa bagong administrasyon ay kapit-tuko ito.
Plantsado na ang pagbubukas ng e-sabong sa Nobyembre. Magpapatuloy ang bangungot ng ating mga kababayan na nasira ang buhay dahil dito. Hanggang ngayon, marami pa ang nag-iiyakan sa sinapit ng kanilang mahal sa buhay dahil sa e-sabong. Kung sabagay may pag-asa pang tinitingala ang mga kaanak ng mga nawawalang sabungeros dahil nandiyan pa naman si Sen. Bato dela Rosa.
Ang tanong, magbubulag-bulagan ba ang mga senador nating makikisig? Ibig bang sabihin, uubra kay Marcos Jr. si AA? May malupit bang backer si AA? Kung hindi mapipigil ng mga senador ang e-sabong ni AA, paano na? Tingnan natin ang mga bagong luklok na senador kung may magagawa sa pagbubukas ng e-sabong.
