Gidakop sa tigbakayan napusilan patay (Sabong News)
Author
Romeo Marantal
Date
SEPTEMBER 07 2021
CEBU, Philippines — Patay ang usa ka giingong sugarol nga nanigbakay human gialegar nga nisukol ug nangilog og armas sa usa sa mga polis nga midakop kanila diha sa Sitio San Roque sa Brgy. Basak San Nicholas sa siyudad sa Sugbu niadtong Domingo sa hapon.
Ang nakalas mao si Faustino Aguilar Dejino Jr. 53, residente sa maong lugar. Samtang ang mga kauban niining nangadakpan sab mao sila si Edwin Belono Ferrolino 52, Jaime Carpina Dinglasa,47, ug Margarito Marfel Conshing, 66.
Ang nironda sa tigbakayan mao ang City Intelligence Unit ( CIU CCPO) pinangulohan ni Police Lieutenant Randy Caballes
Matud pa ni Caballes dunay nanawag sa ilang buhatan kabahin sa ilegal nga sabong og tigbakay sa maong dapit hinungdan nga ilaha kining gisusi.
Matud pa nga ang upat dali nilang nakuptan samtang ang uban nagiyahay og panagan.
Apan sa dihang padung na posasan si Dejino gikatahong misukol kini pinaagi sa pagpamatid ug pagpanukmag sa mga polis.
Atol sa komosyon gikatahong giilog niini ang armas sa usa ka pulis apan sa tanto nilang linayogay nibuto kini ug naigo sa iyang paa si Dejino nga niresulta sa iyang hinanaling kamatayon.—
