Grand opening ng e-sabong ni Ang, sa Sabado na! (Sabong News)
Author
Non Alquitran
Date
OCTOBER 13 2022
TAHIMIK ang Palasyo sa pagbabalik ng e-sabong ng gambling lord na si Charlie “Atong’ Ang. Magkano....este paano na lang ang kaso ng 34 missing sabungeros? Lusaw na? Kung sabagay, mautak talaga si Ang dahil halos isinabay niya ang dry-run ng e-sabong n’ya nitong Oct. 8 sa first 100 days ni President Bongbong Marcos kaya punong abala ang mga alipores ng huli para bolahin ang mga Pinoy.
Teka nga pala, Nabola ba kayo sa 100 days ni BBM mga kosa kong 14 milyon? Hindi lang ‘yan, itinaon din ni Ang na abala ang Senado at PNP sa pagrepaso nitong POGO, na tulad ng e-sabong ni Ang, ay puro patayan din ang ayuda sa gobyerno. Kaya’t kapag hinayaang manatili itong POGO sa bansa, ibig sabihin n’yan hudyat din ito para pabalikin ang e-sabong ni Ang? Susmaryosep! Nagkamali kaya ang 31 Pinoy sa pagpili kay BBM? Eh di wow!
Ang pinagkaabalahan sa ngayon ni Ang at mga alipores niya ay ang grand opening ng e-sabong sa Sabado (October 15. Wala nang makapipigil kay Ang dahil bitbit n’ya ang permit galing kay Games and Amusement Board OIC Atty. Ermar Benitez. Kinunsulta kaya ni Atty. Benitez si BBM o si Executive Secretary Lucas Bersamin bago n’ya aprubahan ang e-sabong ni Ang? Sino kaya ang may kasagutan dito?
Totoo ba na ang pamangkin ni Bersamin ay kasosyo ng kapatid ni Ang na si William sa isang restaurant sa Quezon City? Hehehe! Wala akong pinatatamaan dito mga kosa ha? Hak hak hak! Maraming katanungan dito sa pagbabalik ng e-sabong ni Ang at ang Palasyo lang ang may kasagutan. Hehehe! Kailangan pa bang i-memorize ‘yan? Dipugaaaaa!
Hindi lang naman si BBM ang inaabangan ng mga sabong afficionados para magkomento sa pagbabalik ng e-sabong ni Ang kundi maging sina Sen. Imee Marcos at Sen. Bato dela Rosa, ang chairman ng Senate Committee on National Defense and Security.
Ang magkapatid na sina BBM at Sen. Imee ay tahasang umaayaw sa e-sabong dahil maraming Pinoy ang nagbuwis dito ng buhay, di ba mga kosa? Si Sen. Bato naman ay iminungkahi rin na ipasara ang e-sabong matapos niyang isagawa ang Senate hearing dito. Tumpak! Kaya lang, bigyan din natin ng benefit of the doubt itong sina BBM, Sen. Imee at Sen. Bato mga kosa dahil wala pa naman ang Big Bang ng e-sabong ni Ang. Dipugaaaaa! Kung sabagay, kanya-kanyang gimik lang ‘yan. Mismooooo!
Kasama sa tahimik sa isyu ng e-sabong ni Ang ay sina Pagcor chairman Al Tengco at PNP chief Gen. Junaz Azurin. Eh di wow! Kung sabagay, kung legal naman itong e-sabong ni Ang ay sino pa ba ang haharang dito? Dipugaaaaa! Go go go na ‘yan Boss Atong! Abangan!