EDITORYAL - Illegal gambling (Sabong News)
Author
Edwin Ian Melecio
Date
DECEMBER 02 2018
Gipangusgan sa Police Regional Office-7 ang kampanya karon batok sa ilegal nga sugal nga niresulta sa pagkasikop sa dul-an 600 ka mga sugarol sukad niadtong adlaw nga Huwebes hangtud Biyernes.
Naimbento kini sukad pa tingali sa pagkahimo sa mga tawo ug nahimong industriya sama nianang mga casino niadtong ika-17 siglo didto sa nasud sa Italya.
Sa pagdagan sa panahon nidaghan ang mga klase-klaseng duwa sa sugal, baraha, sabong, mahjong, lumba, karera, electronic gambling, online casino ug bisan gani sa mga paugnat sa kusog aduna nay pinustahay.
Dinhi sa Pilipinas, ang Philippine Amusement Gaming Corporation (PAGCOR) ug Philippine Charity Sweepstakes Office mao lamang ang mga ahensya nga gitugotang mo-operate og pasugalan, ang tanang gustong himuong legal ilang pasugalan kinahanglang mag-agi kanila.
Samtang ang uban legal kay may pagtugot ug may nakuhang bahin ang gobiyerno nga magamit para sa mga tambalanan, proyekto sa panglawas, edukasyon ug sports, kaning illegal gambling lords diretso ra sa ilang bulsa ang tanang kitaon.
Naobserbahan sa mga kabarangayan kining mga tinago-tago nga mga nagpatuong otorisadong outlets sa Small Town Lotto o Swertres sa PCSO outlets. Duna say mga ushers nga magsuot og PCSO vest isip uniporme, ug may ID pa aron kunohay legal silang tan-awon, apan dili diay tinuod.
Diha usab sa mga suok-suok sa kabarangayan makita kining mga video-karera ug molimoli nga gihimong estambayan sa mga drug addicts. Kun magtapok ang mga adis-adis ilabi na kun pildero humok kaayong adunay mahitabong kasamok ug mahimong krimen.
Dili maayo ang sugal sa mga tawong wala na halos kan-on. Nahimo kining hinungdan sa away sa mga magtiayon ug sa ilang pamilya. Ang sugal usa sa mga makalingaw nga pangpawagtang sa kalaay ug pagpalabay sa oras ug dili maayong saligan para sa panginahanglan. Paswertihay lang kun si kinsa ang modaog agi og lingaw-lingaw, apan kun makaguba na og pamilya ug makagubot sa lugar, maayo gyung rondahon.
