Sugyot pagbukas sa mga buwangan gipadaplin (Sabong News)
Author
Le Phyllis F. Antojado
Date
OCTOBER 13 2020
CEBU, Philippines — Resolusyon ni Board Member John Ismael Borgonia pagsuporta sa awhag nga buksan balik ang mga buwangan ubos sa Modified General Community Quarantine (MGCQ) nga mga lugar, gipadaplin.
Si Borgonia miingon nga daghan ang nanginabuhi sa mga buwangan, usa sab kini sa kalingawan sa mga tawo ilabi na nga kabahin na kini sa kultura ug duna say kitaon ang mga local government units gikan niini.
“Ang nahitabo ani karon, ang illegal na nuon.... So kawat kawat nuon ang mga sabongero nato. Dako kaayo kawad-on sa cockpit industry sa pagsira sa mga kuan (cockpit) pero mosabot ta kay tungod sa pandemya,” matod ni Borgonia.
Matud niya, kinahanglan lang sab nga sundon ang minimum health standards sama sa 50% capacity sa venue ug estrikto nga pagpatuman sa physical distancing ug ubang health protocols.
Si Borgonia nagkanayon ang sabong nahimo na parte sa kultura ug kalingawan sa mga Pilipino. Ang mga LGUs gikan sa barangay, lungsod ug syudad aduna usab makuha nga kita gikan niini gikan sa mga taxes sama sa income tax, amusement tax ug business tax.
Apan atol sa regular session sa provincial board kagahapon, gidefer ang maong resolution ni Borgonia.
Matod sa bokal usa sa mga concern sa provincial board mao ang guidelines sa Inter-Agency Task Force nga bawal pa gyud ang panagtapok. /IBM (BANATNEWS)
