67 ka tawo nakalapas sa health protocols nasikop (Sabong News)
Author
Romeo T. Limpangog
Date
SEPTEMBER 07 2020
CEBU, Philippines — Nikabat sa 37 ka tawo kinsa nakalapas sa health protocols batok sa COVID-19 ang nadakpan sa kapolisan sa Presinto 5 sa Lapu-Lapu City Police Office (LLCPO) kagahapon sa buntag.
Si Police Major Airbert Jay Samson, hepe sa Presinto 5 maoy nangulo sa pagpatrolya diha sa Barangay Ibo ug Marcelo Fernan Bridge sa Barangay Pusok.
Matud ni Police Staff Sergeant Anthony Piencenaves sa Presinto 5 nga ang mga nadakpan nakalapas kini sa curfew, wala magsul-ob og face mask, wala usab magdala og quarantine pass.
Gibutyag ni Piencenaves nga lakip sa ilang mga nadakpan taga Dakbayan sa Mandaue ug Lungsod sa Consolacion diin nagpangedaron gikan sa 18-anyos ngadto sa 59-anyos kinsa nag-jogging sayo sa buntag kagahapon.
Ang mga nadakpan makabayad kini og multa nga P1,000 nga maoy labing ubos ug P3,000 ang labing taas depende sa ilang kalapasan o pila ka higayon na kining nakahimo og kalapasan.
Samtang sa Barangay Bacayan ug Guba, Dakbayan sa Sugbo 30 ka tawo kinsa nakalapas sa health protocol ug nagsabong ang nadakpan sa kapolisan sa Talamban Police Station niadtong Sabado.
Si Konsehal Joel Garganera, emergency operation deputy chief implementer nagkanayon nga niadtong Sabado gipahugtan nila ang operasyon diha sa Barangay Bacayan nga adunay taas nga kaso sa COVID-19.
Atol sa maong operasyon 23 ka tawo ang nasikop tungod kay walay facemask, wala nag-social distancing ug uban pa nga kalapasan sa health protocols ug laing upat ka tawo ang nadakpan diha sa Barangay Guba kinsa nalambigit sa sabong.
Dugang ni Garganera nga pasakaan nila og tukmang kaso ang tanang nakahimo og kalapasan.
