Nalunod (Unang bahagi) (Sabong News)
Author
Atty. Jose C. Sison
Date
AUGUST 16 2020
Ang patakaran sa prosekusyon ng krimen ay ituturing na inosente ang isang tao maliban kung mapatunayan ng walang pag-aalinlangan na totoong maysala ang nasabing akusado. Ang bigat ng ebidensiyang inihain ay dapat na sapat para mapakulong ang maysala at mapagtagumpayan ang dikta ng ating Saligang Batas tungkol sa pagiging inosente ng isang mamamayan. Ito ang sinunod sa kaso ng magkapatid na Sherwin, 22-anyos at Christian, 17.
Ang kaso ay nangyari sa pampang ng ilog sa isang isla sa Kanlurang Visayas. Nang gabi na mangyari ang insidente, nakipag-inuman hanggang madaling araw sa harap ng isang tindahan si Sherwin, ang biktimang si Ernesto at si Andro. Pagkatapos ay naisipan nilang pumunta sa sabungan at manood ng sabong. Pero dahil sarado pa noon ang sabungan, nagpunta na lang sila sa kalapit na bahay ni Jude.
Muling bumili ng tuba si Andro at nagpatuloy sila ng inuman nina Sherwin at Ernesto. Lumipas ang kalahating oras at umalis na si Ernesto kasunod si Sherwin. Sinundan sila ni Andro at nakita si Ernesto na naglalaro ng cara y cruz habang nakatingin lang si Sherwin at pinapanood ang laro. Bumalik sila sa sabungan hanggang gumabi.
Matapos ang sabong, muling tumambay ang tatlo sa kalapit na tindahan at nagpatuloy sa inuman. Noon lumapit sa kanila si Christian. Noong huminto na sila sa pagpapakalunod sa alak ay naglakad si Ernesto sa sagingan na may sampung metro lang ang layo at umihi. Nang gabing iyon, hindi nakauwi sa bahay si Ernesto.
Sumunod na araw, pinuntahan ni Mang Boy (tatay ni Ernesto) ang anak na si SPO2 Chavez at nagpatulong para mahanap nito si Ernesto. Hindi nagtagal, ipinaalam kay Mang Boy na may nadiskubreng bangkay na bahagyang natatabunan sa may ilalim ng tulay sa ilog. Nang hilingin ni Mang Boy na magkaroon ng awtopsiya sa bangkay, napag-alaman na ito ang katawan ng anak niyang si Ernesto.
Matapos ang masusing imbestigasyon ng mga pulis at pati ng inquest ng piskalya ay kinasuhan ang magkapatid na Sherwin at Christian ng murder dahil sa pagsasabwatan at pagpatay nila kay Ernesto.
Tatlong testigo ang inihain ng prosekusyon, sina Andro, Jude at Dante, isang magsasaka na pauwi sa kanyang barangay at naghintay hanggang alas-siyete ng gabi para makasakay ng ferry. Ayon sa kanila, sinuntok ni Sherwin si Ernesto dahilan para bumagsak sa lupa.
Nang magpilit na tumayo si Ernesto ay hinampas naman siya ng kaputol na kahoy ni Christian na may dalawang metro ang haba. Kinaladkad daw ng magkapatid ang biktima sa may pampang at inilublob sa tubig hanggang malunod. Tumestigo rin ang medico-legal na sumuri sa bangkay at pinatunayan na namatay ang biktima dahil hindi makahinga sanhi ng pagkalunod.
Itinanggi ng magkapatid na may kinalaman sila sa krimen. Noon daw nangyari ang krimen ay nasa kalapit na siyudad sila. Ang pagkamatay daw ni Ernesto ay aksidente dahil tumagilid ang bangka na sinasakyan nito habang nasa gitna ng ilog ng barangay. (Itutuloy)
