2 piloto dedo sa plane crash (Sabong News)
Author
Boy Cruz
Date
SEPTEMBER 16 2015
BULACAN, Philippines – Patay ang dalawang piloto makaraang bumagsak ang eroplano ng flying school sa likurang bahagi ng sabungan sa Brgy.Lalangan, bayan ng Plaridel, Bulacan kamakalawa ng hapon.
Hindi na umabot ng buhay sa Bulacan Medical Center si Capt. Arthur Rebollido, 40, training instructor at nakatira sa Cubao, Quezon City habang namatay naman sa Our Lady of Mercy Hospital ang estudyanteng piloto na si Capt. James Phillip Oquialda, 24, ng West Service Road sa Parañaque City.
Sa inisyal na ulat nina SPO2 Merwin Lopez at PO1 Gabriel Santos, nagsasagawa ng test flight ang dalawa na lulan ng Cessna 150 plane (RPC-8691) na pag-aari ng Fliteline Aviation mula sa Plaridel Airport nang biglang nagkaaberya ang makina nito.
Agad na bumulusok ang nasabing eroplano sa likurang bahagi na cockfit arena sa Barangay Lalangan kung saan nagaganap ang sabong.
Gayon pa man, hindi sumaklolo ang mga nagsasabong kundi mga residente pa ang nagdala sa mga biktima patungo sa magkahiwalay na ospital.
