31 sikop sa tigbakay sa daanbantayan (Sabong News)
Author
Romeo T. Limpangog
Date
JULY 27 2020
CEBU, Philippines — Nadakpan ang 31 ka tawo sa mga sakop sa Regional Intelligence and Detection Group (RID) sa Regional Police Office 7 ug Daanbantayan Police Station.
Kini atol sa hiniusa nilang pagpangronda sa gipahigayon nga tigbakay sa Sitio Tagasa, Barangay Bitoon, Lungsod sa Daanbantayan.
Si Police Staff Sergeant Ramon Catubig sa Daanbantayan Police Station nagkanayon nga nakadawat na sila og mga taho gikan sa mga nagpakabana nga molupyo labot sa magbalhin-balhin nga lugar sa pagahimoong tigbakay sa pundok sa mga sugarol.
Matud ni Catubig nga ang mga sugarol og manok hiniktan sa ilang dapit mga arang-arang ang pagkabutang sanglit dihang gihimo ang pagpangronda ilang nahibaw-an nga ang kadaghanan kanila pulos mga nagsakay og sakyanan.
Dugang ni Catubig nga pipila sa mga nadakpan nga sugarol sa manok igtatari taga Dakbayan sa Bogo, Lungsod sa Tuburan ug Medellin nga nagdala og mga manok hiniktan ug gikaabot usab ang mga sugarol sa ilang lungsod nga nadakpan sa maong pagpangronda.
Gipalibotan sa nangabot nga mga sakop sa RID ug kapolisan sa Daanbantayan Police Station hinungdan sa ilang pagkasikop ug pagkasakmit sa pustada nga P10,000 nga salapi, unom ka manok igtatari ug unom usab ka bulang nga gitaud sa nasakmit nga manok hiniktan.
Si Catubig niingon nga ang maong mga dinakpan ilang temporaryo nga gibutang sa usa ka lugar nga ubos sa higpit nilang pagbantay tungod ang tanan dili na man masulod sa ilang detention cell.
Ang mga kaso nga illegal gambling, kalapasan sa social distancing ug wala pagsul-ob og face mask ang ilang ipasaka batok sa mga dinakpan nga mga sugarol.
Samtang walo ka tawo ang nasikop gumikan gihapon sa tigbakay sa may Sitio Alugbati, Tiwasan, Barangay Catarman, Liloan alas 11:50 kagahapon sa buntag.
Ang mga nasikop naila nga sila si Ramil Jugalbot, 52, minyo; Renato Cabilan, 40, ulitawo; Jay-Jay Mencide, 24, ulitawo; Roque Fat, 29, ulitawo; Jun Rey Hilaria, 31; Reynaldo Painagan, 27; Arjie Anoos, 29, ulitawo ug Julieto Guañezo, 49, minyo ug pulos taga Liloan. Usa ka joint operations ang gipahigayon tali sa Provincial Intelligence Unit Operatives ug Liloan Police Station nga gipangulohan ni Lt. Col. Randy Korret batok sa ilegal nga sabong sa manok human adunay concern citizen ang nitaho.
Nasakmit gikan sa mga dinakpan ang duha ka manok para sa sabong, P1,200 nga kwarta ug duha ka bulang.
Ang mga dinakpan kasamtangan usa nga gitanggong sa Liloan Police Station samtang giandam pa ang pagsang-at og tukma nga kaso. -
