P3-M, mahinang gastos sa tinamaan ng COVID (Sabong News)
Author
Non Alquitran
Date
APRIL 24 2020
MAHINA pala ang P3 milyon ang gagastusin ng isang dinapuan ng COVID-19 virus sa ospital at kapag minalas ka pa ay mas malaki pa rito ang ilalabas sa bulsa mo. Kung sabagay, si dating Senador Heherson Alvarez ay inabot sa P8 milyon ang bayarin sa ospital. Ang kasamaang palad pa nito ay hindi nailigtas ang buhay ni Alvarez kahit binigyan pa siya nang matinding atensiyon sa ospital dahil wala pa ngang gamot ang COVID. Get’s n’yo mga kosa?
Kaya tama lamang mga kosa kong Pinoy na magkulong na lang tayo sa bahay dahil malaking halaga ang malalagas sa ipon n’yo kapag dumapo ang virus na hanggang sa ngayon ay nananalasa pa, hindi lang sa Pinas, kundi sa buong mundo. Kaya sa mga Pinoy na patuloy na pasaway at matitigas ang ulo, kahit may milyones pa kayo, hindi ito nangangahulugan na ligtas na kayo sa COVID. Hindi kayo kayang iligtas ng pera n’yo vs COVID. Maliwanag? Araguuyyy!
Sa mga pasaway at matitigas ang ulo r’yan, stay at home lang at gamitin ang ayuda na natatanggap n’yo sa gobyerno sa pagkain, gamot at iba pang pangangailangan. ‘Wag nang magsugal tulad ng sabong, tong-its at, lalo na ang mag-shabu para hindi magalit sa inyo si President Digong. Hak hak hak! Kung wala na rin lang kayong milyones, aba ‘wag n’yo na isugal ang inyong buhay dahil tiyak diretso kayo sa crematorium at hindi na masilayan ang bangkay n’yo ng inyong kamag-anak. Ang lungkot kaya, ‘di ba mga kosa? Tumpak!
Dahil marami pa ring pasaway sa kalye, aba ang Special Action Force (SAF)na ang dineploy sa Blumentritt market sa Sta. Cruz, Manila; Libertad sa Pasay City; Pasig public market; Napindan at Lower Bicutan public market sa Taguig; Las Piñas City public market; North Caloocan; Alabang public market; Bagong Parañaque public market and Marikina public market. Itong SAF mga kosa ang fighting unit ng Philippine National Police at hindi sasantuhin ng mga ito ang mga patuloy na lumalabag sa extreme enhanced community quarantine, ayon kay Lt. Gen. Guillermo Eleazar, DeputyChief for Operations (DCO) ng PNP.
Si Eleazar, na commander ng Task Force COVID Shield, ay umikot na sa mga nabanggit na mga lugar at nagbanta na wala nang warning-warning pa sa mga violators at diretso na sila sa kulungan. Araguuyyy! Sinabi ni Eleazar na aabot sa 116 SAF commandos o 12 teams ang ikakalat sa 10 lugar sa Metro Manila kung saan na-monitor ang mga pasaway na Pinoy. Tinitiyak pa ni Eleazar na mahirap o mayaman ka man ay dadamputin kayo ng SAF kapag hindi kayo sumunod sa alituntunin ng gobyerno vs COVID. Kapag naayos na ang mga lugar na binabantayan ng SAF, ililipat na sila sa mga lugar kung saan maraming na-monitor na ECQ violations.
Kaya mga kosa, ‘wag na kayong magpakalat-kalat sa kalye para di kayo madapuan ng virus at maiwasan ding ma-judgement call kayo tulad ng kaso ni Marawi war veteran, Winston Ragos, na nabaril sa Quezon City noong Miyerkules. Sad naman! Abangan!
