Pait tiawan seryosong kahimtang (Sabong News)
Author
Javier Tapulado
Date
APRIL 24 2020
Dako na’g nagasto atong gobiyerno sa pagpanghatag og hinabang pinansiyal ngadto sa mga piniling katawhan. Pinili tungod kay dili man tanan makadawat.
Maoy giuna ang mga poorest of the poor kay mao kunoy grabeng naapektohan sa Enhancement Community Quarantine (ECQ) sa Pilipinas.
Ang sakit lang paminawon, kay kon kinsa kadtong walay tarong trabaho, o wala gyoy trabaho, maoy mga reklamador ug badlongon kaayo. Kon unsay gidili, pirmeng gisupak.
Tiaw bay, sa Manila, adunay mga nadakpang mipahigayo’g sabong ibabaw sa sekretong roof top sa usa ka bilding. Puwerting sukoa ni Presidente Duterte. Mibahad nilang mga badlongon, nga sila prisohon, dili pakan-on ug buhian lamang inig wala nay COVID-19. Ug kinsa bay malipay ning ilang gibuhat?
Samtang ang mga edukado, propesyonal ug taxpayers relihiyoso kaayong mituman sa mando sa pangulo, ang ECQ gitiawtiawan lang sa mga kanahan.
Ang tuyo sa gobiyerno nganong migastog binilyon ka pesos, aron mahipos ang tanang katawhan sulod sa tagsatagsa ka panimalay pinaagi sa paghatag og mga relief goods and financial assistance sulod sa ECQ period, diin usa ray hangyo ni Tatay Digong: ‘Seryosohon ang pagtuman sa iyang ECQ order.’
Usab, gidili ang fake news. Ilabi na’g may kalabotan sa COVID-19 issues. Ug girespeto ba kini sa tanan? Dinhay usa ka konsehal, usa kanhi ka sakop sa Talisay City Rescue Team ug usa ka optometrist sa Mandaue City ang ambot, nakalimot ba, nga bawal ang pekeng balita?
Kay sila wala mahadlok mopabuhagay og fake news sa social media, sila gipatawag sa mga mayor. May nangayog pasaylo. Adunay gipasakaag kasong kriminal. Ug wala na mabalitai kon ang tulo pulos ba miagig priso tungod sa sipyat nga ilang nahimo?
Niining bag-o, usa ka beteranang artista sa entablado ug magsusulat, ang lain na usab nga gipasanginlang mipakatap og fake news sa iyang Facebook account.
Siya gidakop ug napriso. Hinuon, gibuhian ra human makapiyansa og P42,000 alang sa tulo ka kasong gisang-at batok kaniya.
Kini nagpaila lang, nga ning seryoso natong kahimtang sa pagpakiggubat sa COVID-19, dili maayo nga apilan nato’g tiaw o dili tinuod nga balitang i-post nato sa social media.
Kay pait diay ang atong dangatan – bilanggoan! Unta, makahatag kinig dakong pagtulon-an.
