STL sa Mandaue gihugtan sa pagbantay sa kapolisan (Sabong News)
Author
Rowena D. Capistrano
Date
MAY 24 2021
CEBU, Philippines — Higpit nga gibantayan sa kapolisan sa Mandaue City Police Office (MCPO) ang ilegal nga operasyon sa mga small town lottery STL sa kabarangayan sa Dakbayan sa Mandaue
Gihimo sa kapolisan ang paglibot sa kabarangayan ug gipangdakop ang nagpasiugda ug gipangsakmit ang mga ebidensiya.
Sa operasyon niadtong Mayo 20 hangtod sa Mayo 22, 2021 mokabat sa siyam ka mga STL booth ang gisirad-an ug siyam usab ka tawo nga nagsilbing teller ang gipangdakop.
Naglakip sa naghimo sa operasyon mao ang unom ka mga police station ug City Intelligence Unit (CIU) sa MCPO.
Si Police Major Zosimo Jabas, operation and management unit chief sa MCPO miingon nga ilang gipasakaan og kaso ang siyam nga ilang nasikop.
Subay niini si Jabas miawhag sa publiko sa pagtaho ngadto kanila labot sa masigpatan nga mga ilegal nga STL sa dakbayan.
Samtang unom ka mga tawo nga nalambigit sa illegal nga sabong ang nasikop sa may Ramona Village 1, Barangay Dumlog, Talisay City niadtong Domingo sa buntag.
Ang mga nasikop naila nga sila si Venerando Lonzaga, 55anyos, ulitawo, walay trabaho; Alberto Amante, 46anyos, ulitawo, construction worker, taga Barangay Ilihan, Toledo City; Romel Cabague, 37anyos, construction worker; Jorge Amancio, 50 anyos, minyo, driver; Felipe Baculpo,66 anyos, minyo, walay trabaho, ug Leo Rafols,57anyos,minyo, welder ug residente, Dumlog Talisay City.
Nakadawat og tahu ang kapolisan sa Talisay Police Station sa maong illegal nga kalihukan hinungdan nga dali silang miresponde.
Nasakmit gikan sa mga dinakpan ang 2 ka mga samaran nga manok nga adunay buwang ug 300 pesos nga pusta.
Sa laing operasyon nasikop usab ang laing upat ka tawo diha sa Sitio Pangpang, Barangay San Isidro, Dakbayan sa Talisay.
Ang gidakop giila nga si Gimer Sembreno Tarantanta, 30 ug Johnny Apostol Camero, 38 nga parehong residente sa Sitio Isla Verde, Barangay, San Isidro, Dakbayan sa Talisay. Laing nasikop uban kanila mao sila, Anselmo Secretaria Sapilan, 63, residente sa Fairview Village, Barangay Lawaan 2, Dakbayan sa Talisay, Cebu ug Roldan Marcillana Palayahay, 20, usa ka delivery boy ug residente sa Sitio Isla Verde, Brgy. San Isidro.