Kris aminadong wala nang pag-asa sa TV! Kontento na sa socmed (Sabong News)
Author
Ed de Leon
Date
DECEMBER 17 2017
Matindi iyong statement ni Kris Aquino, kung saan inamin niya na nagkaroon sila ng “break up” ng dati niyang home network na ABS-CBN. Inamin din niya na “naka move on” na ang network at ganoon din naman siya pero imposible na ang “starting over again”.
Ibig sabihin talagang malabo na siyang bumalik sa ABS-CBN, kahit na nga sinasabi ng mga natitira niyang fans na magbalik na siya, dahil wala namang ibang TV network na kumuha sa kanya matapos niyang umalis sa ABS-CBN. Ngayon nga ay isang video blogger na lang siya sa Facebook.
Ang unang nagbigay sa kanya ng break sa TV noon ay si Kuya Germs, pero natakot din naman ang Master Showman noong mahulog siya sa stage ng show sa Araneta Coliseum. Tapos noon napunta na nga siya sa ABS-CBN kung saan ginawa na yata niya lahat ng klase ng shows. Tapos dumating nga iyong sinasabi niyang “break-up” at iyon na rin ang tuluyang naging “break” ng kanyang career.
Nakipag-negotiate siya kay Tony Tuviera, walang nangyari. Nitong huli si Willie Revillame na ang kausap niya, wala ring nangyari. Ibig sabihin, hindi interesado ang rival network ng ABS-CBN na GMA 7.
Hindi na siya puwede sa TV5, aba si Leila Chikadora na ang reyna roon. Bakit kaya hindi niya subukan ang Channel 13 o ang Channel 4. Ang importante may masabi siyang network at hindi iyong nakikisakay na lamang siya sa Facebook. Kahit na isang maliit na network, ok lang iyon kaysa naman diyan sa magdadalawang taon na siyang hindi nakikita sa TV maliban sa commercial ng sabong panlaba.
Matapos lamang ang anim na linggo, naging platinum na agad ang album ni Regine Velasquez na R3.0, na ginawa kasabay ng kanyang naging matagumpay ding concert sa kanyang ikatlong dekada sa show business. Huwag ninyong sabihin na si Regine ay nakaligtas sa mga pirata. Alam namin, ang album na iyan ay biktima rin ng piracy, pero sa kabila noon bumenta pa rin.
Maitatanong ninyo ngayon, kung napirata rin ang album ni Regine, ano ang dahilan at umabot pa iyon sa platinum sa loob lamang ng anim na linggo?
Iyan kasing album na iyan ay isang commemorative album, ibig sabihin iyan iyong gustong bilhin ng collectors. Iyang mga kolektor, hindi mo aasahang bibili iyan ng pirated. Hindi rin sila bumibili ng isang kopya lang, dahil isa ay patutugtugin nila at ang isa pa ay karaniwang itinatago nila. Iyang mga collector ng musika ang nawala noong nawala rin ang vinyl records at ang ginamit ay tapes, dahil alam nila na hindi naman tatagal ang tapes. Pero ngayong may CD na, aktibo na ulit ang mga collector.
Iyang piracy, ang paniwala namin ay problema lang kung novelty songs, ibig sabihin pakikinggan lang ng minsan ay wala na. Pero iyong mga kanta ng mahuhusay na singers talaga, at iyong mga album na magaganda ang kanta, kahit na sabihin mong mapirata iyan, ang bibilhin pa rin ng tao iyong original copies dahil masama naman ang kopya ng pirated eh.
Kahit naman sino, kung maganda ba ang kanta payag kang sa pirated copy mo lang mapapakinggan? Kaya nga naniniwala kami na iyang piracy ay hindi talaga isang malaking bagay.
Isa pa, iyan naman daw album ni Regine, doon pa lang mismo sa concert niya sa arena ay umabot na iyan sa gold. Isipin nga ninyo iyong concert na iyon, ang talagang plano one day lang iyon. Eh talagang matindi ang demand, ginawa nilang two days. Nagkasisihan pa noon dahil ang sinasabi puwede pa palang gumawa ng isang matinee noong second day at malamang sold out pa rin, pero kawawa naman si Regine na masyadong mapapagod sa pagkanta.
