Unta sugal sa patay dili idili (Sabong News)
Author
Javier Yntig Tapulado
Date
MARCH 07 2020
Ang hugtanong pag-implementar og panakop sa illegal nga sugal, labi nag ang paggukod sa mga malapason, dili off and on, usa ka dalaygong buhat.
Apan kon diha sa pagpatuman ning maong balaod, nagbaha gihapon ang nagkalainlaing matang sa ilegal nga sugal ning atong sosyedad, diin makahibulong, nga bisan daghan nang illegal gambling machines ang gipangguba human masakpi sa aktong nag-operate, inay mahanaw, nagpadayon nga ingon sa walay kukahadlok, kini dili na dalaygon. Mahimo nang salawayon.
Hantak, tigbakay, suwertes ug daghan pa ang naghitak sa bisan asang suoksuok dinhi sa dakbayan hangtod kabukiran. Nganong dili man gyod kini mahanaw?
Wala kahay nagpahiping hinungdan nganong ang mga gipanggukod nga sugarol dili gyod motagam? Nganong makabalita man ta usahay gikan sa mga naghantak nga niadtong naaktohan sila sa polis nga nanagsugal, dihang mialibwag silag panagan, ang naglaundok mang pusta maoy gisikop? Unya sila, wala na gukda?
Sa laktod, dili gyod masulbad ang unsay gidili, kon ang gihatagag prayoridad sa mananakop mao ang gahom sa salapi nga usahay molum-it sa katuskig sa unipormeng ilang gisul-ob.
Hinungdan, nga dihang gironda sa kapolisan ang usa ka bulangan sa Carcar City nga mipahigayog sabong sa gidiling adlaw, may mga senior citizen ang nahiapil sa pagkasikop. Hinuon, gibuian ra kuno dayon kay ang edad 80 anyos kapin na.
Kini nagmatuod, nga ang pagpanakop sa kapolisan, tokartokar lang. Kay kon giistrikto pa, wala nay manugal og ilegal nga moabot og 80.
Kinsa man kunong sugarola ang makaabot kon sa bata pa ang maong sugarol gisikop na sa mga otoridad? Ang pait god, kon hasta mga mananakop (di tanan, ha?) mao ra pod diay mga dakpononon?
Mao nga makapahimuot hunahunaon. Sanglit maglisod man silag pahunong sa ilegal nga sugal, aw, hasta magsugal samtang nagbilar sa haya, gidili na. Kay dali ra man ning sikopon.
Ang naandang paagi sukad pa sa kakaraanan nga makakolektag tong nga ikapuno paglimos ngadto sa namatyan, gidaginot pa. Husto ba?
Mga tsip, kanang mga dinagkong ilegal ang gukda. Ayaw intawon iapil nang para sa patay. Sagad baya sa mibuhat niini, mga pobre. Kadtong walay ikapalit og lungon. Unya, dili mo maluoy?
Unta sugal sa patay dili idili.
