Mag-asawa kumasa sa raid, todas (Sabong News)
Author
Jorge Hallare
Date
MAY 04 2021
CAPALONGA, Camarines Norte, Philippines — Bumulagta ang isang mag-asawa habang pinaniniwalaang sugatan ang ilang rebelde matapos silang pumalag at makipagbarilan sa mga pulis at sundalo na maghahain sana ng search warrant sa bahay ng mga suspek sa Purok-2, Brgy. San Antonio ng bayang ito kamakalawa ng madaling araw.
Kinilala ang mga nasawi na sina Noeme Avesando Marca, 51-anyos at misis niyang si Lourdes, 49-anyos, pawang residente ng nasabing barangay.
Sa ulat, dakong alas-2:30 ng madaling araw, bitbit ang search warrant na inilabas ni Judge Arriel Dating ng Daet Regional Trial Court (RTC)-Branch 41 kasama sina Brgy. Kapitan Norberto Murillo at Kagawad Joel Hernandez bilang mga testigo ay sinalakay ng mga operatiba ng Police Provincial Intelligence Unit, 96th Infantry Batallion ng Philippine Army, 2nd Provincial Mobile Force Company at Capalonga Police sa superbisyon ni Capt. John Lawrence Sabong ang bahay ng mag-asawang Marca dahil sa pag-iingat ng mga hindi lisensyadong baril.
Gayunman, pinutukan ng may 10 hinihinalang kasapi ng New Peoples Army (NPA) na nasa bahay ng mag-asawa ang mga operatiba at tinamaan sa katawan ang may hawak ng search warrant na si Patrolman Michael Betchayda na masuwerteng nakaligtas dahil sa suot na bullet proof vest.
Bunsod nito, gumanti ng putok ang raiding team na umabot pa ng 15-minuto ang engkuwentro hanggang sa tumimbuwang ang mag-asawa at nagsitakas ang mga rebelde kasama ang ilang nasugatang kasamahan.
Nakuha sa lugar ang dalawang bomba (improvised explosive device) na may detonating cord at fuse, isang kalibre 45 pistola, isang kalibre .38 revolver at mga bala ng M16 rifle.
