EDITORYAL - Itigil ang e-sabong (Sabong News)
MARAMING mambabatas ang pabor na ipatigil na ang e-sabong dahil sa hindi magandang ibinubunga sa mga nahuhumaling sa sugal na ito. Lumalala ang epekto ng online sabong at masama ang kinahahantungan. May gumagawa ng masama para matustusan ang pagkahumaling nila sa sugal. May mga pulis na nagnanakaw para mabayaran ang milyong utang sa e-sabong. May OFWs na lulong na rin at nasisimot ang perang para sa pamilya.
Noong Huwebes, nagsagawa ng hearing ang Senado ukol e-sabong at pati na rin sa misteryosong pagkawala ng 30 sabungero. Mula pa Disyembre 2021, nagsimula nang mawala ang mga sabungero. Ayon kay Senador Bato, chairman ng Senate Committee on Public Order, irerekomenda niyang itigil muna ang online sabong hangga’t hindi nasosolb ang problema sa mga nawawalang sabungero. Ayon kay Bato, naaalarma na siya sapagkat sinisira ng e-sabong ang buhay ng ilang gumon sa sugal. Bukod dito, banta rin sa kaayusan at katahimikan ang e-sabong.
Ayon sa report, nakunan ng CCTV ang mga sasakyang pumasok sa mga sabungan sa Metro Manila at nang lumabas ay hinihinalang nakasakay na ang mga sabungero. Ayon pa sa senador, malaki ang hinala niya na may mga corrupt na pulis na kasangkot sa pagkawala ng mga sabungero. Ang style umano ng pagkawala ng mga sabungero ay katulad sa modus na ginagawa ng mga masasamang pulis at military. Sinabi ni Dela Rosa na magpapatawag siya ng Senate inquiry ukol sa kontrobersiyal na isyung ito sa e-sabong.
Kabilang sa mga inimbitahan sa inquiry ng Senado ang mga opisyal ng Philippine Amusement Gaming Corporation (Pagcor), National Bureau of Investigation (NBI), Philippine National Police (PNP), particular ang regional directors ng lugar kung saan nawala o dinukot ang mga sabungero.
Noon pang Disyembre nawala ang mga sabungero at hanggang ngayon, hindi pa sila natatagpuan. Ayon sa kaanak ng nawala, wala silang maaasahan sa PNP. Walang maibigay na tulong kung paano matatagpuan ang kanilang mga mahal sa buhay.
Bilisan ang pag-iimbestiga sa mga nawawalang sabungero at utusan ang PNP na hanapin ang mga ito. Itigil naman ang e-sabong na maraming sinisirang kinabukasan. Hindi dapat pinapayagan ang sugal na ito.
