Espinoza: Dili legal ang operasyon sa e-sabong? (Sabong News)
GIPAUNDANG sa Senado ang operasyon sa e-sabong tungod sa pagkawagtang sa 31 ka sugarol. Ang komitiba ni Senador Bato dela Rosa, sa Public Order ug Dangerous Drugs sa Senado, nagpatawag og hearing niadtong Huwebes, February 24, aron pagtino sa pagkawagtang sa 31 ka tawo.
Ang mosyon ni Senate President Tito Sotto nga isuspenso ang lisensya sa e-sabong gisegundahan ni Senador Ping Lacson hangtud nga maresolba ang pagkawagtang sa 31 ka sugarol. Matud pa ni Senador Koko Pimentel nga morag kusganon pa sa Philippine National Police ning grupo nga nagpaluyo sa pagkawagtang sa 31 ka tawo.
Ang gisuspenso nga mga lisensya sa e-sabong naglangkob sa mosunod nga operators: Belvedere Vista Corp., Lucky 8 Star Quest Inc., Visayas Cockers Club Inc., Jade Entertainment and Gaming Technologies Inc., Newin Cockers Alliance Gaming Corp., Philippine Cockfighting International Inc., ug Golden Buzzer Inc.
Gitumbok ni Dela Rosa ang Sta. Cruz WPM Arena sa Sta. Cruz, Laguna nga notoryos tungod kay diha nangawagtang ang 23 ka sugarol sa upat nga higayon. Matud pa ni Dela Rosa nga tungod sa e-sabong, dunay usa ka pulis nga nadakpan sa pagpanulis kay miabot na sa P1 milyon ang iyang utang. Susmaryosep!
Ang lisensya sa mga nagpadagan sa e-sabong naggikan sa E-Sabong Licensing Department sa Philippine Amusement and Gaming Corp. (Pagcor). Apan matud ni Senador Francis Tolentino, atol sa maong committee hearing, walay gibasihan sa balaod ang paghatag sa Pagcor og lisensya ngadto sa mga operator sa e-sabong.
Walay probisyon sa Republic Act (RA) 9487, ang balaod nga nag-amendar sa charter sa Pagcor, nga naghatag og katungod sa Pagcor sa paghatag og lisensya sa mga operator sa e-sabong, pung pa ni Tolentino. Gikwestiyon usab ni Tolentino ang pagmugna sa Pagcor sa ilang E-Sabong Licensing Department tungod kay ang RA 9487 wala magtugot niini.
Apan si Diane Erica Jogno, acting assistant vice president sa E-Sabong Licensing Department, midepensa nga ang ilang gisandigan sa paghatag og lisensya sa mga operators mao ang opinyon sa Office of the Solicitor General, Department of Justice, ug memorandum gikan sa Executive Secretary. Si Tolentino mi-insister nga way legal nga basihan gikan sa balaod o sa Kongreso nga naghatag sa Pagcor og katungod sa paghatag og lisensya sa mga e-sabong operators. Ato ba ni sabton nga ang Malakanyang maoy nagtugot sa e-sabong?
Tungod sa e-sabong, daghan na kaayo ang krimen nga nanghitabo lakip na ang pagkawagtang sa 31 ka sugarol, ang pulis nanulis, ug mga taxi driver nga nalulong sa e-sabong di na motunol sa ilang abangan ngadto sa tag-iya sa taxi. Gawas niini, luoy sad ang mga tag-iya sa mga legal nga buwangan tungod kay ang e-sabong 24/7 ang operasyon, samtang ang buwangan Domingo o holidays ra ang buwang.
Kining mga krimen nga nahitabo tungod sa e-sabong maoy unya mahimo nga dakong rason nga dili na tugtan sa Kongreso ang ilang operasyon. Kon ipaundang sa Senado ang e-sabong, di kaha magpalaban ang mga operator sa Malakanyang? Matud sa mga hungihong, binilyon ang kita matag buwan sa e-sabong.
