Mga selpon sa mga pulis giukay, gisubay kon dunay e-sabong app (Sabong News)
KASO nga administratibo ang atubangon sa mga pulis sa probinsiya sa Cotabato nga mapamatud-an nga dunay e-sabong app sa ilang mga cellphone.
Kini ang bahad ni Cotabato Police Provincial Deputy Director Colonel Bernard Tayong.
Atol sa panagtapok sa mga opisyal ug mga sakop sa Cotabato Police Provincial Office, mismong si Tayong ang nangunay sa pag-inspeksiyon sa mga cellphone.
Mando ni Cotabato Police Provincial Director Colonel Harold Ramos ang surprisa nga inspeksiyon sa mga cellphone sa mga pulis.
Daghanang mga pulis sa kaulohan ang nabuang sa e-sabong app sa ilang cellphone diin naapektuhan ang ilang trabaho ug ang ilang pamilya.
Giingong kadaghanan sab sa mga pulis sa kaulohan ang mga nalambigit sa carnapping, motornapping, robbery holdup ug theft gumikan sa pagkapildi sa e-sabong.
Gikanayon ni Tayong nga wala silay nadiskubreng e-sabong App sa mga cellphone sa kapulisan sa probinsiya sa Cotabato.
Una na nga nagbahad si Police Regional Office-Soccsksargen Regional Director Bregadier General Alexander Tagum nga taktakon sa serbisyo ang silot sa mga pulis nga nalambigit sa e-sabong ug uban pa nga illegal gambling activities.
