Barrita: Online sabong magpadayon (Sabong News)
ANG abong, tari, buwang o tigbakay nahimo nang tipik ug kabahin sa kulturang Pilipinhon. Dunay mga buwangan. Sa matag pista sa bisan mga gagmay nga sitio ug purok, dunay tigbakay nga illegal ug sagad rondahon sa kapulisan. Dinaganay dayon. Ang sugarol nga masigmit, magtingkagol sa prisohan.
Apan nakahibawo ba mo nga ang founder sa Amerika, si George Washington, nagpabuhi og mga manok igtatari sa iyang mga ulipon? Sa dihang nagpili ang Kongreso sa Amerika kon unsay ilang himuong nasudnong langgam, duhay ilang gipilian – ang agila ug ang manok igtatari. Nidaog ang agila apan usa ka boto ray labaw.
Labing minos duha ka mga presidente sa Estados Unidos, si Andrew Jackson ug si Abraham Lincoln, mga sabungero. Si Lincoln naila nga “Honest Abe” tungod sa iyang kamatinud-anon isip referee o kuyme sa buwang.
Ginaingon nga matinud-anon ang tanang tawo sud sa buwangan. Ang mga sugarol magtinutokay lang. Way kontrata. Kon magdaug na, ipanglabay lang ang kuwarta sa ruydahan. Ang mopunit kadto rang nakadaog. Kon manago ka, di ka mobayad kon mapildi ka, di ka makagawas nga buhi o labing minos maputos kas bun-og.
Alegre kaayo ang buwang. Hilabihan kasaba ug kagahob ang buwangan, bisan ang tigbakayan, sa panahon nga magmasiyar na ang mga masyador. Samot na kon maglinabukay na ang mga manok. Unya kon duna nay modaog, mokalit lang og kahilom. Dunay magngisi, dunay huyhoy ang abaga.
Sa panahon sa pandemic, gipahunong ang operasyon sa mga buwangan. Apan ang mga sugarol mangita man gyud og paagi mao nga mitumaw ang online sabong. Ang mga sabungero adto na lang sa mga online sabong centers mopusta. Mahimo gani sa smartphone. Pusta sa inilog ug sa biya. Sa Tinagalog pa, meron ug wala. Bisan usa ka gatos, makasugal ka.
Si Senador Ronald “Bato” dela Rosa, usa ka kaalyado ni Presidente Rodrigo Duterte, nangamahan sa Senate Resolution No. 996 nga nag-awhag sa pangulo nga suspensuhon ang operasyon sa online sabong sa tibuok nasod tungod sa misteryusong pagkahanaw sa labing minos 34 ka mga sabungero.
Apan ang Malacañang nagdumili sa pagsuspenso sa online gambling permits. Si Executive Secretary Salvador Medialdea mikonpirmar niini. Apan ang kapulisan ug ang Philippine Amusement Gaming Corporation (Pagcor) nga maoy nagluwat sa permits, nagpadayon sa pag-imbestigar niadtong nakalapas sa e-sabong agreements.
Gimandoan usab ang Philippine National Police ug ang National Bureau of Investigation sa pag-imbestigar sa pagkahanaw sa labing minos 34 ka e-sabong players. Si Pagcor chairperson Andrea Domingo niingon nga makaapekto sa ekonomiya ang pagsuspenso sa online sabong tungod kay mikita kini og labing minos P640 milyones matag buwan sukad sa buwan sa Enero ning tuiga.
