Rabacal: E-sabong makaboang (Sabong News)
DAGHAN nang mga tawo ang nangaboang niining e-sabong. Ang uban, apil na ang mga tinugyanan sa balaud, napuno na sa utang samtang ang uban naghimo nag krimen tungod niining maong sugal. Mao kini ang labing grabeng sugal nga nahitabo tungod kay bisan ang mga bata nga anaa ra sud sa ilang kwarto, mga mag-uuma nga tua sa halayong umahan ug mga ordinaryong trabahador, makaapil man niini. Ang mga overseas Filipino workers (OFW) sa nagkalainlaing mga nasud ug mga mariner sa langyaw nga mga barko nga kaniadto dagko kaayo og matigum nga salapi nga ipada sa ilang mga minahal sa kinabuhi karon magka-utang-utang na tungod sa e-sabong.
Tungod sa dautang nahimo niining e-sabong, daghang mga senador ug ubang mga pulitiko nga gustong undangon kining maong sugal apan wa kini magmalampuson. Sumala kang Pagcor chairman and chief executive officer Andrea Domingo nga walay kasugoan gikan sa Malacañang nga hunongon ang e-sabong bisan kon miinsister si Senador Ronald “Bato” dela Rosa nga nagkahinabi sila ni Presidente Duterte ug uyon kini nga hunongon ang maong sugal. Sumala ni Domingo nga lisud hunongon ang e-sabong kay naghatag kinig dakung salapi sa Pagcor nga mokabat og P640 ka milyon matag buwan isip share sa gobiyerno.
Apan gigamayan ra si Senador Franklin Drilon sa bahin sa gobiyerno sa dihang gipahibawo ni Atong Ang, tag-iya sa Lucky 8 Star Quest Inc. nga mokita sila og P1 bilyon ngadto sa P2 bilyon sa matag adlaw nga pustada. Sa ato pa P60 bilyones ang tibuok niyang kitaon matag buwan. Kuhaan kuno kini sa komisyon sa ahente ug ubang galastuhan, mga P900 milyones na lang ang mahibilin niya matag buwan. Apan sa iya lang kining grupo. Anaa pay unom ka laing kompaniya nga operator usab sa eSabong.
Ang kita sa mga kompaniya gikan sa Abril 2021 ngadto sa Enero 2022 mao kining mosunod: Lucky 8 Star Quest, inc. P526,826,428.839; Belvedere Vista Corporation – P86,771,015; Visayas Cockers Alliance – 3,068,612.985; Jade Entertainment and Gaming Technologies Inc. 5,346,357,447; Newin Cockers Advance – 1,205,290,000; Philippine Cockers Fighting International – 6,856,268,000 ug Goldern Buzzer, Inc. – P746,350,941. Ang matag kompaniya kinahanglan mobayad og P2.5 million nga license fee, P75 million nga cash performance bond, ug labing minus P75 million sa matag adlaw nga sultada. Mao ra kini ang makita sa Pagcor. Husto ra ba ang makobra sa gobiyerno gikan sa e-sabong operators? Ang tanang mosugal sa e-sabong mopusta og labing minus P100 matag sultada. Dili man hinuon ko mosugal niini maong nangutana lang ko sa akong mga amigo nga adunay kasayuran sa e-sabong nga sila si Pare Pat Navarro ug Teofy Gutang. (mannyrabacal1144@gmail.com)
