7 nagsabong sikop sa Kiblawan, Tagum (Sabong News)
PITO ka mga sabongero ang nadakpan sa managlahing lugar sa mga probinsiya sa Davao del Sur ug Davao del Norte.
Paslak sa prisohan ang duha ka mga lalaki human nasikop sa mga pulis nga nagsabong alas 3 sa hapon, Oktubre 31, 2021 didto sa Purok 3, Bagong Silang sa Kiblawan, Davao del Sur.
Subay sa report sa Kiblawan Municipal Police Station, nasayran nga usa ka report ang miabot sa ilang buhatan sa kapulisan labot sa mga lalaki nga nagpasabong sa dapit.
Daling miresponde ang mga pulis, hinungdan nga maayong pagkasikop nila Ludifranco Solis Aballe, 42, minyo, mag-uuma, ug usa ka Ronnie Montero Sabal, 43, mag-uuma, kinsa pulos molupyo sa Purok 2, San Isidro.
Nakuha sa ilang posisyon ang duha ka mga igtatari nga manok, naa sab lima ka mga bihag ug kuwarta nga P1,650 nga maoy ilang pusta.
Nasayran nga sa nagdulong pa ang mga pulis sa dapit, naghinay-hinay na nga nanagan ang mga tawo nga nanugal sa maong pasabong.
Samtang didto sa Davao del Norte, lima ka lalaki ang nalit-ag sab sa mga pulis sa Tagum City Police Office sa gilusad nga anti-illegal gambling operation sa Purok Timog, Barangay Visayan Village, Tagum City alas 10:35 sa buntag Dominggo, Oktubre 31.
Nadakpan mao sila Teofilo Doron Tabale, 51, minyo, way trabaho nga taga Purok Timog, Barangay Visayan Village; Jaime Darnilles Buera, 55, minyo, way trabaho, taga Purok Anahaw, Barangay Visayan Village; Jolito Maso Solis, 44, minyo, laborer nga taga Purok Timog, Barangay Visayan Village; Wilfredo Manatad Mojado, 54, minyo, drayber nga taga Purok Ipil-ipil, Barangay Visayan Village; ug Janry Ondo Anino, 29, ulitawo nga molupyo sa St. Therese Subd., Barangay Visayan Village.
Nasakmit sa mga pulis gikan sa mga suspek ang duha ka mga manok panabong nga duna pay tari, duha ka bayong ug P2,900 nga pusta.
Mga nahisgutan pasakaan og paglapas sa Presidential Decree 449 kun Cockfighting Law of 1974.
