Singer iniwan ng pamilya dahil sa pagiging sabungero (Sabong News)

Dapat pala ay magsusumbong na sa isang malaganap na programa ang isang male singer, du’n sana niya ilalabas ang kanyang saloobin, tungkol ‘yun sa kanyang personal na problema. Pero may mga pumigil sa kanya, huwag na lang daw, dahil baka siya pa ang mapahiya nang todo sa kanyang irereklamo. Ang nagmamaniobra pa naman sa programa, kapag ang nagrereklamo ang napatunayang mali, siya pa ang kakastiguhin ng host at hindi ang kanyang isinusumbong. Kuwento ng aming source, “Problemado kasi ngayon ang male singer, pinagtataguan siya ng kanyang mag-iina. Mahabang panahon na niyang hindi nakikita ang anak niya. “Gustung-gusto na niyang ilapit ‘yun sa isang programang sumbungan ng mga inaapi at walang kakayahang lumaban, kaso, maraming nagpayo sa kanya na huwag na lang!” unang kuwento ng aming source. Baligtad daw kasi ang mangyayari kapag nakausap na sa programa ang kanyang karelasyon, siya ang mapapahiya, siya pa ang irereklamo. Patuloy ng aming source, “Hindi naman kasi ang side niya ang pakikinggan sa programa, kailangan ding makausap ang inirereklamo, para patas lang ang laban. “E, nag-aalala ang mga friends ng male singer na kapag nagsalita na ang girl, e, siguradong siya na ang mapupuruhan! Natural lang na ipagtanggol ng girl ang kapakanan nilang mag-ina! “Ikukuwento ng girl na paano naman silang hindi mag-aalsa-balutan ng anak niya, e, baka mamatay sila sa gutom sa poder ng male personality! Puro bisyo kasi ang inaatupag niya! “Sa halip na ang pamilya niya ang isipin ng male singer, e, inuuna muna niya ang pagsusugal na napakatagal na nilang pinag-aawayan! Kundi nga sa pamilya ng girl na sumusuporta sa kanila, e, baka matagal nang natsugi sa gutom ang ang mag-iina niya! “Pangkain na lang nila, e, ipinangsusugal pa ng male singer, kapag natalo, e, umuuwi siyang napakainit ng ulo, kaya palagi silang nag-aaway! “Kaya dapat lang siyang iwan ng partner niya! Dapat lang na bigyan siya ng leksiyon! Wala siyang pagbabago, puro palpak ang mga pangako niyang iiwasan na niya ang sugal! “Pero sabong pa rin siya nang sabong! Wala siyang kadala-dala, kakampihan ba siya ng host ng sumbungang programa kapag lumabas ang totoong kuwento?” napapailing na pagtatapos ng aming impormante. Ubos! Napanood na namin nang buo ang pelikulang Revirginized ni Sharon Cuneta. Tama ang paalala ng henyong direktor nito na si Darryl Yap, hindi para sa mga Sharonians ang pelikula, pero siguradong maipagmamalaki nila ang kanilang idolo. Ibang-ibang Megastar kasi ang iniluwa sa proyekto, ang singer-actress na palaging kinakawawa sa una pero biglang reresbak sa bandang huli, hindi ganu’n ang atake ng Revirgi­nized Naganap lang ang kuwento sa loob nang magdamag at kinabukasan ay bigla nang nagbago ang pananaw sa buhay ng misis na sinaktan ng kanyang mister sa pagkakaroon ng escabeche. Nagmumura ang binigyang-buhay na papel ni Sharon, binitiwan pa niya ang salitang tumutukoy sa ari ng lalaki, na kahit minsan ay hindi niya ginawa sa alinmang pelikulang pinagbidahan niya. Matindi nga ang panghalina ng mga salita ni Direk Darryl Yap para mapapayag nito ang Megastar na gawin ang pelikula na walang alaala ng mga dating proyekto ni Sharon. Ang pagdila niya ng asin sa dibdib ni Marco Gumabao, ang pagwawalwal niya nang magdamag para makalimot sa kanyang problema, isang kagulat-gulat na eksena dahil sa totoong buhay ay hindi naman umiinom si Sharon pero nagam­panan niya ‘yun nang buong husay. Sa bandang dulo ng pelikula ay ang reyalisasyon. Hindi dapat magmukmok sa isang sulok ang babae kapag nabibigo at nasasaktan sa pakikipagrelasyon. Babae ang hahanap ng paraan para kahit pansamantala lang ay malimutan niya ang sakit, kailangan niyang baguhin ang kanyang kapaligiran, pero hindi niya pa rin isinusuko ang kanyang prinsipyo. Walang mga rehas ang pagtakas sa isang relasyong sa halip na kaligayahan ay sakit pa ang iniwanan sa babae. Pero kailangang handa ang kanyang kalooban sa anumang magaganap dahil ang pakikipagmahalan ay isang sugal. Babae ang gagamot sa kanyang sugat. Kundi na siya maligaya sa piling ng kanyang mister ay kailangan na niyang lumabas. Hindi bale nang malungkot siya nang nag-iisa kesa sa dalawa pa rin sila nang wala naman siyang nararamdamang ligaya. Makata ang direktor na sumulat ng kuwento. Sensitibo. May respeto. Panahon ngayon ni Direk Darryl Yap.