Dili ganahan og prisohan (Sabong News)

Usa sa posibleng katin-awan nganong ganahan si Presidente Rodrigo Duterte og mas laktod nga pagpatuman sa balaod, mao ang iyang panglantaw nga dili na matarong pa ang mga piniriso: “Dili na sila ganahang mogawas kay nawad-an na man og kahulogan ang ilang kinabuhi. Manulis lang na’g usab, maglingaw-lingaw, mag-inom, mag-sabong, dayon mosugot na nga mapriso na sab.” “Dili na sila takus nga makigrelasyon og babaye. Nadaot na na ang ilang utok. Timan-i na. Mangtas na sila. Mahimo na silang mabayot. O pasakitan nila ang babaye. Mao nga kasagaran nila mabalik sa prisohan.” * * * Sa ato pa, kon ipahamtang ni Presidente Duterte ang iyang pagtuo, wa na’y kapuslanan ang mga prisohan, kay wa na diay kahigayonan nga mausab ang mga piniriso ug makabalik isip mapuslanong mga sakop sa katilingban. Mao diay nga magsige og pasumbingay ang presidente sa iyang mga diskurso nga nag-usik-usik lang ang gobiyerno og kuwarta sa pagpakaon sa mga piniriso. Mao diay nga iyang gibalikbalik nga angay’ng patyon ang mga kriminal kay naghuot na ang mga prisohan ug wa na’y luna para sa dugang mga piniriso. Sa ato pa, sa panghunahuna ni Duterte, ang silot sa kamatayon dili lang alang sa bangis nga krimen, kon dili, alang sa tanang kriminal. * * * Apan ang kasinatian ning prisohan sa Norway, momatuod nga dakong sayop si Duterte. Ang Bastoy nga nahimutang sa isla giisip nga labing maayong prisohan sa tibuok kalibutan. Ang mga piniriso makalaag sa tibuok isla ug gitagad isip dagkong tawo. Lahi sa ubang prisohan nga gidid-an ang mga piniriso sa pagkupot og hinagiban, ang taga Bastoy gawasnon nga magdala og mga martilyo, atsa ug chainsaws nga ilang gigamit paglimpiyo sa kalasangan, pagpananom og mga utanon ug pagbuhi og mga hayop sa isla. * * * Sa laktud, gipaabot ang mga piniriso nga moatiman sa ilang kaugalingon. Kon dili sila manglimpiyo, malibon ang tibuok isla. Kon dili atimanon ang ilang tanaman ug kahayopan, wa sila’y kan-on. Pinaagi sa paghatag nila og responsibilidad, naglaom ang mga tagduma nga mahimo silang maayong mga silingan. Tuod man, ang Norway ang labing gamay og mga kanhi piniriso nga mahibalik sa prisohan sa Scandinavia. Sila sab ang labing gamay og mga piniriso, kon itandi sa ubang kanasuran sa kalibutan. ( )