Diamante, Lagon maghiusa na (Sabong News)
Author
Gregg M. Rubio
Date
DECEMBER 12 2019
CEBU, Philippines — Gisugdan sa mga managkaribal nga mga politiko sa Lungsod sa Tuburan ang panaghiusa alang sa kaayuhan sa katawhan ug mapapas na sa listahan sa mga lugar nga init ang politika matag dunay eleksyon.
Si Tuburan Vice Mayor Democrito “Aljun” Diamante nipadangat sa iyang pasalamat kang Kongresista Sonny Lagon sa Ako Bisaya Party List ug sa grupo nga gipangulohan sa iyang kapikas nga si Daphne Lagon sa pagbisita atol sa sesyon sa Sangguniang Bayan niadtong Lunes.
“This act would surely be a beginning of a united Tuburan. “Panaghiusa Para sa Katawhang Tuburanon” Daghan kaayong salamat kaninyong tanan,” matud ni Diamante sa iyang Facebook diin dunay hulagway sa grupo.
Matud ni Diamante nga pagtinabangay lang gyud alang sa Tuburan ang ilang gihigsutan. Gitanyagan nila og opisina ang Ako Bisaya PL aron makatabang sa katawhan ingon man ang buhatan ni Kongresista Pablo “PJ” Garcia diin si Daphne ang focal person. Ang mga Lagon kaalyado sa mga Garcia sa 1Cebu Party.
“Kaloy-an intawn sa Ginoo ug matinuod tanan nga plano dili nasad mi ma-hot spot,” matud ni Diamante.
Si Daphne nagdumili pa sa pagluwat og pamahayag human sa maogn panagtigum.
Gipasabot ni Diamante nga makaayo sab sa mga kandidato sa probinsiya ug distrito ang ilang panaghiusa panahon sa eleksyon. Niadtong 2013, si Diamante nidaug sa ikaduhang termino sa pagka-mayor batok ni kanhi mayor Rose Marie Suezo samtang ang iyang manghud nga karon nga si Mayor Danilo “Danny” Diamante nakadaug isip bise mayor batok ni Daphne. Paryente sila si Aljun ug Daphne kinsa ang inahan usa ka Diamante.
Sa 2016, si Aljun nidaug og 46 botos batok ni Daphne sa pagka-mayor hinungdan sa pagsang-at niini og protesta sa Regional Trial Court sa Toledo City.
Ang korte nipabor kang Daphne kinsa nidaug og 93 botos batok ni Diamante apan ang Commission on Elections Second Division niluwat og writ of preliminary injunction nga nagmando kang RTC Judge Hermes Montero sa paghunong sa kaso.
Sa 2019, si Daphne gipilde ni Danny sa pagka-mayor samtang si Aljun napili nga bise mayor. Sa maong eleksyon sab nakakuha og lingkuranan sa Kongreso si Sonny isip party list representative. Sila si Aljun ug Sonny parehong mahiligon sa sabong sa manok.
