Di ganahan og prisohan (Sabong News)
Author
ARANGKADA
Date
SEPTEMBER 02 2017
Usa sa posibleng katin-awan nganong ganahan si Presidente Rodrigo Duterte og mas laktod nga pagpatuman sa balaod mao ang iyang panglantaw nga di na matarung ang mga piniriso: "Di na sila ganahang mogawas kay nawad-an na man og kahulogan ang ilang kinabuhi. Manulis lang nag usab, maglingaw-lingaw, mag-inom, mag-sabong, dayon mosugot nang mapriso na sab."
"Di na sila takos nga makig-relasyon og babaye. Nadaot na nang ilang utok. Timan-i na. Mangtas na sila. Mahimo na silang ma-bayot. O pasakitan nila ang babaye. Maong kasagaran nila mabalik sa prisohan."
***
Sa ato pa, kon ipahamtang ni Presidente Duterte ang iyang pagtuo, wa nay kapuslanan ang mga prisohan. Kay wa na diay kahigayonan nga mausab ang mga piniriso ug makabalik isip mapuslanong mga sakop sa katilingban.
Mao diay nga magsige og pasumbingay ang presidente sa iyang mga diskurso nga nag-usik-usik lang ang gobyerno og kuwarta sa pagpakaon sa mga piniriso. Mao diay nga iyang gibalikbalik nga angay'ng patyon ang mga kriminal kay naghuot nang mga prisohan ug wa nay luna para sa dugang mga piniriso. Sa ato pa, sa panghunahuna ni Duterte, ang silot sa kamatayon di lang alang sa bangis nga krimen kon dili alang sa tanang kriminal.
***
Apan ang kasinatian ning prisohan sa Norway momatuod nga dakong sayop si Duterte. Ang Bastoy nga nahimutang sa isla giisip nga labing maayong prisohan sa tibuok kalibotan. Ang mga piniriso makalaag sa tibuok isla ug gitagad isip dagkong tawo.
Lahi sa ubang prisohan nga gidid-an ang mga piniriso sa pagkupot og hinagiban, ang taga Bastoy gawasnong magda og mga martilyo, atsa, ug chainsaws. Nga ilang gigamit paglimpiyo sa kalasangan, pagpananom og mga utanon ug pagbuhi og mga hayop sa isla.
***
Sa laktod, gipaabot ang mga piniriso nga moatiman sa ilang kaugalingon. Kon di sila manglimpiyo, malibon ang tibuok. Kon di atimanon ang ilang tanaman ug kahayopan wa silay kan-on. Pinaagi sa paghatag nila og responsibilidad naglaom ang mga tagduma nga mahimo silang maayong mga silingan.
Tuod man, ang Norway ang labing gamay og mga kanhi piniriso nga mahibalik sa prisohan sa Scandinavia. Sila sab ang labing gamay og mga piniriso kon itandi sa ubang kanasuran sa kalibotan.
