53 ka tawo nasikop sa kapolisan sa Talisay (Sabong News)
Author
Gabriel C. Bonjoc
Date
OCTOBER 30 2019
CEBU, Philippines – Nikabat sa 53 ka tawo ang nasikop sa gihimong dungan nga operasyon sa kapolisan sa Dakbayan sa Talisay sugod niadtong adlaw’ng Lunes diha sa nagkalain-laing barangay.
Si Police Major Gerard Ace Pelare, hepe sa kapolisan sa siyudad nibutyag nga nipahigayon sila og operasyon diha sa Barangay San Roque, Tabunok, Lawaan 1 ug Bulacao.
Matud ni Pelare nga 22 ka tawo ang nadakpan human kini nasakping namalit og ginadiling drugas, 25 ang nasakpang nagpahigayon og sugal sama sa swertres, tong-its ug sabong sa kaka samtang unom ka tawo ang nasikop pinasikad sa warrant of arrest.
Gihangyo usab sa kapolisan sa siyudad kadtong adunay mga armas nga expired na ang permit nga itahan kini.
“Mga law abiding man hinuon ni sila. Ang ila lang nga expire na ang ilang mga armas,” matud pa ni Pelare.
Si Pelare nagkanayon nga daghan sa mga nadakpan gumikan sa sugal ang nihangyo nga sila mapasakaan na og kaso aron makapiyansa tungod kay mokuha pa sila og eksaminasyon sa ilang tunghaan.
Matud pa ni Pelare nga walay gipili ang ilang operasyon basta klaro lang usab nga naghimo og ilegal nga kalihukan ang usa ka tawo.
Dugang ni Pelare nga wala nila gi-focus ang ilang operasyon sa Barangay Tanke lang tungod kay daghan sa mga karaang mamaligyaay og ginadiling drugas ang nibalhin na sa pagpuyo.
