Operator og E-sabong nagtinguha pag-operate sa siyudad (Sabong News)
Author
Sanden J. Anadia
Date
AUGUST 13 2021
CEBU, Philippines — Dunay usa ka operator sa E-Sabong ang nagtingoha nga mag-operate dinhi sa Siyudad sa Sugbo ug makig-partner kini sa mga legal nga cockpit.
Nananghid kini sa Siyudad sa Sugbo apan mag-agi kini og lapad nga diskusyon ug pagtoon sa konseho.
Matud pa ni Konsehal Phillip Zafra kinsa miyembro sa committee on games and amusement sa Konseho sa Siyudad sa Sugbo nga paminawon pa nila ang proposal sa maong operator aron masuta kun haom ba kini karong panahona ilabi na ang plano niini sa pagpatuman sa health protocols.
Hinuon ang maong butang giduso na ngadto sa Cebu City Gamefowl Commission ug sa Emergency Operations Center alang sa dugang pagtoon.
Duna pu’y gamay nga kabalaka si Zafra sa E-sabong tungod kay basin og maka-agni kini sa mga minor de edad.
Gusto masayod ang konsehal kun unsa ang plano sa operator nga dili kini sayon nga ma-access kun makit-an sa mga minor.
Base sa nadawat nga impormasyon ni Zafra, ang maong operator sa “E-Sabong” makigpartner sa mga sabongan diha Tejero ug Agsungot. “Ato lang sa paminawon ang ilang proposal, mag-agi pa na og mga discussion, matud pa ni Zafra.