Daghang sugarol ang nasikop sa pagpangronda atol sa semana santa (Sabong News)
Author
Iris Hazel M. Mascardo
Date
APRIL 05 2021
CEBU, Philippines — Dili mominus sa 19 ka mga tawo ang nasikop sa mga myembro sa Cebu City Intelligence Unit (CIU) tungod sa iligal nga tigbakay niadtong Sabado Santo sa Sitio Tambisan, Barangay Tisa, Dakbayan sa Sugbo.
Si Police Lt. Colonel Randy Caballes, hepe sa CIU, miingon nga dunay nakasibat nga dili mominus usab sa 19 ka tawo.
Ang mga nasikop nag-edad gikan sa 20 hangtud 65 anyos, nga pulos naaktohan sa mga otoridad ug nakuha gikan kanila ang duha nga mga fighting cocks, duha ka gaffs ug 2,000 nga kwarta.
Matod ni Caballes, nga dunay nitahu sa ilang buhatan kabahin sa nagpadayon nga ilegal nga kalihukan.
“Gamay-gamay raman ni nga tawo sauna,then katong gahapon lang kay daghan ug tawo kay kini man gud sila layo-layo pa lang,makita na dayon, katong mga several attempts (arrest) before,di na gyud sila maabtan,”segun niya.
Sa inisyal nga imbestigasyon kadaghanan kanila mga residente sa parehas nga barangay diin usab sila gidakop, samtang ang pipila kanila gikan sa silingan nga barangay.
Giingon usab ni Caballes nga, ang sabong giplano sa mga suspetsado subay sa pagsaulog sa semana santa.
Samtang ang kapolisan sa Mandaue City Police Office (MCPO) nakasikop usab og dili mominus sa 14 ka mga sugarol nga naatlan usab nga nagtigbakay niadtong Biyernes Santo diha sa managlahing lugar sa siyudad.
Ang Bogo Police station nakasikop usab ug kapin sa napulo ka mga sugarol niadtong Huwebes Santo, Abril 1, 2021.
