83 ka tawo sikop sa ilegal nga sugal sa Dakbayan sa Sugbo (Sabong News)
Author
Rowena D. Capistrano
Date
APRIL 06 2021
CEBU, Philippines — Mokabat sa 83 ka mga tawo ang nasikop gumikan sa illegal nga sugal sa managlahi nga lugar sa Dakbayan sa Sugbo panahon sa semana santa.
Si PLT COL Ryan Devaras, Deputy City Director for Administration sa Cebu City Police Office miingon nga sa 83 ka mga dinakpan, 19 niini ang nalambigit sa illegal nga sabong, samtang ang uban tungod sa hantak ug baraha.
Samtang hapsay ug malinawon ang nilabay nga semana santa, base sa monitoring sa kapulisan sa Dakbayan sa Sugbo.
Suma pa ni Police Col. Josefino Ligan Cebu City police office director nga wala kaayoy nagpabadlong hinungdan nga hapsay ra ilabi na ang pagpatuman sa mga lagda diha sa Carbon Market.
Dugang pa ni Ligan, nga dali ra usab nila nga nabadlong ang mga nangaligo og dagat diha sa SRP niadtong Domingo.
Sa laing bahin nasakmit sa kapolisan sa Presinto 6 sa Mandaue City Police Office (MCPO) ang armas ug shabu gikan sa pusher nga ilang nadakpan sa buy-bust operation diha sa Sitio Huyong-Huyong, Barangay Tawason, Dakbayan sa Mandaue niadtong Sabado Santo.
Si Police Lieutenant Winston Magdadaro ang deputy chief sa Presinto 6 sa MCPO miila sa nadakpan nga mao si Noel Cani Maribajo, 32 anyos nga nagpuyo sa Purok Kamaisan, Barangay Tolo-Tolo sa Lungsod sa Consolacion.
Nakuha gikan sa dinakpan ang mokabat sa P8,840 nga kantidad sa shabu uban sa kalibre 380 nga pistola uban sa magazine nga adunay duha ka buhing bala. —
