5 ‘killer cop’ ng online seller pinasisibak (Sabong News)
Author
Doris Franche
Date
AUGUST 10 2021
MANILA, Philippines — Pinasisibak sa serbisyo ni PNP chief Gen. Guillermo Eleazar ang limang pulis ng Nueva Ecija na Isinasangkot sa pagdukot at pagpatay sa babaeng online seller noong nakaraang buwan.
Ayon kay Eleazar, pinamamadali niya sa PNP Internal Affairs Service (IAS) ang summary dismissal proceedings laban sa mga suspek na kinilalang sina SSgt Benedict Matias Reyes, SSgt June Malillin, Cpl. Julius Alcantara, MSgt Rowen Martin at SSgt Drextemir Esmundo.
Nasa kustodya na ng pulisya sina Reyes, Mallilin, Alcantara at caretaker na si Dario Robarios habang pinaghahanap sina Martin, Esmundo at sibilyang si Franklin Macapagal alyas “Kelly” na ka-meet up ng biktimang si Nadia Casar.
Sa pahayag ng Grab driver, may idineliber umano si Casar noong Hulyo 20 kay Macapagal sa Sta. Rosa, Nueva Ecija at agad ding umalis matapos ang transaksiyon. Subalit ilang metro pa lamang silang nakakalayo ay hinarang sila ng limang armadong lalaki sakay ng isang pickup at motorsiklo.
Piniringan ang Grab driver at si Casar saka sila dinala ng limang suspek sa isang safehouse hanggang palayain ang una ng mga suspek kaya nagkaroon siya ng pagkakataon na humingi ng tulong sa PNP-Anti Kidnapping Group.
Sa follow-up operation, natagpuan ang sunog na bangkay ni Casar sa Sitio Pinagpala, Brgy. Imelda Valley, Palayan City, Nueva Ecija. Narekober na rin ang sasakyan na ginamit ng mga suspek na pulis.
Samantala, iniimbestigahan na rin ang isang police colonel mula sa PNP Maritime Group na may-ari ng farm sa Palayan City, Nueva Ecija kung saan natagpuan ang sunog na bangkay ni Casar.
Ayon kay Eleazar, ang limang pulis na mula sa iba’t ibang bayan sa Nueva Ecija na sangkot ay magkakasama rin sa anti-illegal drug operations. Pinabeberipika na nito ang report na ilan sa kanila ay sangkot din sa “Online Sabong” kung kaya’t naghahanap ng iligal na paraan para kumita ng malaking halaga ng pera.