Mga sabongero nagsalimoang sa pagpanagan (Sabong News)
NAGKAPANDOL-PANDOL nga daw miapil sa lumba sa dagan ang mga sabongero human gironda sa kapulisan alas 2:45 sa hapon niadtong Sabado, Disiyembre 19, 2020.
Sumala kang M'lang Chief of Police Lieutenant Colonel Realan Mamon nga nakadawat sila og impormasyon sa mga nagtari-tari sa Purok 8, Barangay Dalipe, M'lang.
Abtik nga nagpahigayon og surprisang operasyon ang kapulisan apan sa wala pa makaabot sa target nanagan na ang mga sabongero.
Hinungdan nga bisan usa sa mga nanabong, walay nadakpan sa mga pulis kay dali lang nga nanibat.
Apan gidemalas pod ang mga nanibat kay nahabilin ang ilang mga motorsiklo, bisikelta, mga tsinelas ug mga panabong nga mga manok.
Sa pag-ukab sa mga pulis sa lingkuranan sa mga motorsiklo, nakita didto ang mga Official Receipt ug Certificate of Registration gikan sa Land Transportation Office, hinungdan nga nailhan ang mga sabongero.
Giandam na sa M'lang Municipal Police Station ang pagpasaka og kaso batok sa mga nahisgutan.
