Delos Reyes: Ang kawa sa eleksiyon (Sabong News)

MAAYONG adlaw mga SuperSuki! Luyo sa dagko nga mga suliran sa nasud, mga bagyo ug sa pandemya sa Covid-19, nisugod na pagkainit ang kawa samtang pila ka bulan na lang ang nabilin sa pagduso og sertipiko sa kandidatura sa mga kandidato, bulan sa Oktubre karong tuiga. Kamatuoran nga usa sa gikahinaman sa katawhang Pinoy mao ang sabong sa katawhan diin sampukon ang ilang ginamanok sa natad sa eleksiyon. Hunyo na ta karon ug nagkaduol sa deadline sa pag-file sa mga certificate of candidacy (CoC) sa mga buot magpapili sa nagkadaiya nga posisyon gikan national hangtud sa pinakaubos nga level sa eleksyion sunod tuig. Ang politikanhon nga partido ni Presidente Rodrigo Duterte nagsugod na sa ilang paglahugay ug posible nga masiak o mabungkag na sab ang pundok tungod kay gibaliwala man ang gahum sa acting president, Senador Manny Pacquiao, sa pagpahigayon sa panagtagbo sa mga sakop sa partido didto sa Cebu, bag-ohay pa lang. Tumong sa konsultasyon sa PDP-Laban nga makuha ang suporta sa mga sakop aron iduso ug awhagon nga modagan pagka- bise presidente si President Digong sa eleksiyon sa 2022. Ginatan-aw ug ginapaabot sa katawhan nga mausab ang hunahuna ni Davao City Mayor Sara Duterte-Carpio nga dili siya interesado sa pinakataas nga posisyon sa atong panggobyerno sa nasud kay 2034 pa ang iyang ginatan-aw nga panahon kon siya ang matuman. Sa resulta sa survey nga gipahigayon sa Pulse Asia Research Inc. niadtong bulan sa Marso, nag-una sa listahan si Mayor Sara sa nagustohan sa katawhan nga mahimong Presidente sa nasud diin 27 percent sa katawhan ang mipabor kaniya. Si Vice President Leni Robredo nga gihugon-hugon nga ituboy sa Liberal Party nga mas nailhan nga Dilawan, nakabaton lang og 7 percent, nan, unsaon man pagdaug sa kaatbang ugaling sila ang magharong? Ang political party ni Mayor Sara nga Hugpong ng Pagbabago, posible maoy mahimong dako nga partido kay naandan naman sa mga politiko nga mobiya sa ilang partido ug motapon sa mahimong dominante inig abot sa eleksiyon. Giangkon ni Mayor Sara nga nahimong pinasahe niyang bisita sa iyang birthday si Senador Imee ug Bongbong Marcos apan wala siya mihatag og detalye sa ilang gihisgutan. Natural lang matud sa Mayor nga kon politiko ang magkatagbo, mahisgutan ang politika. Daghan ang nagbalay-balay sa ilang huna-huna nga Carpio-Marcos na sab ang magpares sunod eleksiyon. Mosakripisyo kaha si President Digong nga ipadaplin ang pagtuboy sa iyang partido nga modagan pares ni Mayor Sara ug ihatag na lang ang higayon kang Bongbong? Sa wala paghatag og detalye ni Mayor Sara sa ilang gihisgutan ni Bongbong, dili ba kaha si Bongbong ang mikombinse sa mayor nga himuon niya nga ka-tandem pagka-bise presidente si Mayor Sara? Naghigwaos ang katawhan kay gusto na mahibalo unsay mahimong dagan kay karon pa lang daan, duna nay napulsohan ang kadaghanan alang sa 2022 election. Mipalag si Senator Panfilo Lacson sa posibleng Carpio-Duterte tandem sa 2022 sa pag-ingon nga dili Davao ang Pilipinas nga kon nahimo sa pamilyang Duterte ang pagkupot sa tanan nga posisyon sa gobyerno sa dakbayan, ila sab kini himuon sa nasud Pilipinas. Daghan ang nagatuo nga sa nahimo nga kasaysayan sa pamilya Duterte sa dakbayan sa Davao, posible nga maghimo kini og lain nga kasaysayan alang sa katawhang Pinoy ug sa nasud. Alang kanimo, duna ka na bay mga pangalan nga bilog-bilogan sa imong balota sa adlaw sa eleksiyon?