Todas si Mister (Unang bahagi) (Sabong News)
Author
IKAW AT ANG BATAS
Date
JULY 01 2017
ANG self-defense ay puwedeng dahilan para makalusot sa pagpatay ng isang tao. Puwede rin kayang gamitin ang “self-defense” sa kaso ng battered wife syndrome kung paulit-ulit na binubugbog ng isang mister ang kanyang misis. Pwede kayang hindi makulong ang isang babae kahit pa mapatay niya ang asawa? Ito ang isyu sa kaso nina Vicky at Leo.
Magkakilala pa simula pagkabata sina Vicky at Leo. Hindi lang sila magkapitbahay at magkaklase kung hindi magpinsan o third degree cousins. Naging malapit sila sa isa’t isa dahil lagi silang magpartner tuwing fiesta. Kaya lang, kung nakatapos si Vicky sa kursong Bachelor of Science in Business Administration at may matatag na trabaho, hindi naman nakatapos si Leo at naging mangingisda sa isang kompanyang namamalaisdaan.
Kahit pa tutol ang kanilang mga magulang ay natuloy magpakasal sina Vicky at Leo. Sa bahay ng mga magulang ni Leo sila nakatira. Masaya silang namuhay at nagkaroon ng dalawang anak hanggang sa maisipan nilang bumukod na. Lumipat sila sa isang barangay at nangupahan. Doon nag-umpisang umasim ang kanilang relasyon. Madalas silang mag-away lalo at kung umuuwi si Leo sa madaling araw na lasing at natalo sa sabong. Madalas mauwi sa pananakit ang kanilang pag-aaway kaya laging bugbog-sarado si Vicky. Kung minsan ay humahantong sa paghihiwalay ang kanilang away pero magkakasundo rin ang dalawa. Kung tutuusin, limang beses tinangkang umalis ni Vicky pero lagi rin siyang hinahabol ni Leo at magkakabati na sila.
Pero nagbuntis si Vicky sa ikatlong pagkakataon. Hindi man lang naawa si Leo at patuloy pa rin sa pananakit sa kanyang asawa tuwing nag-aaway sila. Tatlong beses sa isang linggo kung bugbugin ni Leo si Vicky sa loob ng labing-isang taon nilang pagsasama. Katunayan, sa anim na taon nilang pagsasama, may mga rekord sa ospital na magpapatunay sa anim (6) na beses na dinanas ni Vicky na hematoma o matinding pandurugo sa dibdib at iba pang parte ng katawan. Mayroon pang dalawampu’t tatlong (23) beses na nakaranas ng matinding pananakit ng ulo at hypertension o pagtaas ng presyon si Vicky. Walong buwan na ang tiyan ni Vicky nang hindi umuwi si Leo. Nagsabong kasi ito kasama ang isang katrabaho pagkatapos kolektahin ang kanilang sweldo. Nagpasama si Vicky sa pinsan na si Cely para hanapin ang mister. Naghanap sila sa bandang palengke pero hindi nila nakita ang lalaki. Kaya nakiusap si Vicky kay Cely na matulog na lang sa bahay para hindi siya bugbugin ng mister. Pagdating nila sa bahay ay nandoon na pala si Leo at lasing na naman. Hindi na nga ito makatayo sa tindi ng kalasingan. Nag-away na naman ang mag-asawa at nahawakan pa ni Leo ang leeg ng pobreng misis. Nakuhang makawala ni Vicky at tumakbo sa kuwarto ng mga anak. Pero hindi natapos ang kanilang pag-aaway at lalo pang tumindi. Nasaksihan at narinig pa ito ng mga dumadaan ang away ng dalawa. (Itutuloy)