EDITORYAL - Walang nananalo sa sugal (Sabong News)
KUNG kukunin ang opinyon nang marami ukol sa nagawa ni Jessie Carlos na panununog sa Resorts World Manila noong nakaraang Biyernes, kinubabawan na siya ng masamang espiritu dahil sa matinding galit, pagkaaburido at kawalan nang sumusuporta. Marami ang naniniwala na suicidal na talaga si Carlos at nakahanda na sa anumang mangyayari sa kanya. Naniniwala marahil ang gunman na hindi na siya makakalabas nang buhay kaya siya na mismo ang kumitil sa sarili. Nagbaril siya sa sarili habang nilalamon ng apoy ang kanyang paligid. Nakita ang sunog na bangkay ni Carlos na hawak pa ang armalite rifle.
Ang saklap nang nangyari kay Carlos na dahil sa pagkalulong niya sa sugal ay marami siyang dinamay. Hindi maubus-ubos ang luha ng mga kamag-anak ng biktima. Karamihan ay empleado at guest ang mga biktima na umabot sa 37. Pawang pagkalanghap ng usok ang ikinamatay ng mga biktima dahil nagkulong sila sa kuwarto. Hindi nila makita ang daraanan dahil sa usok.
Napakasama talaga ng sugal kapag nagpaalipin dito ang isang tao na kagaya ni Carlos na kayang magpatalo ng milyon sa isang gabi. Lumobo ng P4 milyon ang kanyang utang at naibenta ang mga ari-arian sa Batangas. Pati ang mga sasakyan ay unti-unting naipagbili para pambayad sa utang. Hindi lang sa casino siya nalulong kundi pati na rin sa sabong na nagpapatalo rin ng milyones. Pinakamalakas siyang tumaya na para bang wala nang bukas.
Nagkahiwalay silang mag-asawa. Mayroon umano silang dalawang anak. Para mapigilan ang asawa sa lalo pang pagkalubog sa sugal, ni-request niya sa PAGCOR na pagbawalan itong maglaro. Tumalima naman ang PAGCOR at na-ban si Carlos sa lahat nang casino. Dun nagsimula ang trahedya sa Resorts World.
Case closed na raw ang nangyari, ayon sa PNP. Maaaring sarado na nga ang kaso, pero huwag sanang kalimutan ng mamamayan ang aral sa trahedya. Iwasan ang sugal sapagkat walang nananalo rito at ginagawa pang demonyo ang talunan.
