EDITORYAL – Responsibilidad ng mga casino (Sabong News)
PINILI ng gambling addict na si Jessie Carlos na magpakamatay kaysa ayusin ang kanyang buhay. Nagbaril siya sa sarili at nilamon ng apoy na siya rin ang nagsindi. Ang masaklap, nagdamay siya ng 37 inosenteng tao. Madilim na ang nakikita ni Carlos at para sa kanya wala nang ibang paraan kundi ang sirain ang lugar na nagdulot sa kanya nang pagkabaon sa utang. Matinding galit ang kanyang nadama sa Resorts World Manila makaraang i-ban siya roon noong Marso sa request na rin ng kanyang asawa. Ang pagbabawal sa kanyang magsugal sa mga casino ang nakadagdag sa pagkaaburido ni Carlos. At isang maitim na balak ang kanyang naisip. Sinalakay ang Resorts World, dala ang mahabang baril at ilang litro ng gasolina. Tagumpay siyang nakalusot sa mga guwardiya, nagpaputok ng baril, sinunog ang mga mesa at nagnakaw ng chips.
Pero hindi sana ito umabot sa malagim na trahedya kung nagkaroon nang pagkalinga ang casino sa katulad ni Carlos na maituturing na lulong sa sugal. Isang sakit ang pagkalulong sa sugal at walang ibang makakatulong sa kanya kundi ang mga kamag-anak na rin. Kailangang i-rehab ang katulad ni Carlos na walang pinagkaiba sa mga lulong sa illegal na droga. Dahil sa pagkalulong ni Carlos, naibenta niya lahat ang ari-arian at nagkahiwalay pa silang mag-asawa. Nasira ang buhay niya dahil sa sugal. Bukod sa casino, lulong din sa sabong si Carlos.
Hindi ang pagbabawal kay Carlos na magsugal ang tamang paraan. Mas nakapagbigay pa ito sa kanya nang feeling na siya ay pinagmamalupitan. Sana natulungan siya ng casino na magpa-rehab. Naisalba sana ang buhay niya at hindi nadamay ang 37 iba pa.
Ayon sa PAGCOR, mayroong 450 gambling addict sa bansa. Dapat matutukan sila para hindi matulad kay Carlos.