Pagbukas og balik sa buwangan gitun-an pa gihapon (Sabong News)
Author
Sanden J. Anadia
Date
MARCH 26 2021
CEBU, Philippines — Gibutyag ni Mayor Edgardo Labella nga padayon pa niya nga gitun-an ang rekomendasyon sa Cebu City Gamefowl Commission nga buksan og balik ang buwangan.
Matud ni Labella nga nakadawat usab siya og sugyot sa Emergency Operations Center (EOC) nga tugotan ang online sabong ug bukas siya sa maong ideya.
Ug kong mabalik ang cockfighting ipaniguro nga matuman ang health protocols.
Sa online sabong giingong layo kini sa transmisyon sa COVID-19 tungod kay dili magdugok ang mga tawo niini.
Sayo pa, si Labella nipadayag nga dili kini motugot nga ibalik ang naandan nga set-up sa buwangan tungod kay naglambigit kini og mga tapok-tapok.
Nasayran nga adunay upat ka dagkong cockpit arena sa Dakbayan sa Sugbo.
Nalatid sa rekomendasyon sa Gamefowl Commission nga walay audience sa arena ug tugotan lang nga makasulod mao ang mga handler ug ang ilang assistant.
Base sa guidelines sa Interagency Task Force (IATF) gitugtan na niini ang pagbukas sa legal cockfighting arenas sa mga lugar nga ubos sa Modified General Community Quarantine (MGCQ).
Una na nga gihingosgan ni Konsehal Phillip Zafra ang kampaniya batok sa mga tigbakay diha sa mga sitio gumikan kay gawas nga illegal delikado kaayo kini sa pagkuyanap sa COVID-19.
