Gilas pipilitingmanalo sa Tunisia (Sabong News)
Author
John Bryan Ulanday
Date
SEPTEMBER 06 2019
MANILA, Philippines — Sibak man sa kontensyon ng 2019 FIBA World Cup ay may gintong pagkakataon naman ang Gilas Pilipinas na makasikwat ng upuan sa 2020 Tokyo Olympics sa Japan.
Kamakalawa ay tumirik ang Nationals kontra sa Angola sa overtime, 81-84, at nahulog sa 0-3 ang kartada sa Group D matapos din ang 108-62 at 126-57 kabiguan kontra sa Italy at Serbia, ayon sa pagkakasunod.
Subalit hindi natatapos doon ang kampanya ng tropa dahil sasalang pa sila sa classification round kung saan hangad nila ang magandang ranking para maging Best Asian Team.
Ayon sa format, ang Best Asian Team sa FIBA World Cup ay mapipili bilang awtomatikong koponan na kakatawan sa Asya sa Olympic Games sa susunod na taon sa Tokyo, Japan.
Nakatakdang labanan ng Gilas Pilipinas ang Tunisia ngayong alas-8 ng gabi sa classification phase sa Wukesong Sports Arena.
May tsansa sana ang host na China na masikwat ito subalit natalo sila sa Venezuela, 59-72, sa Group A na naglaglag sa kanila sa classification.
Ito ang nagbigay-daan sa Gilas gayundin sa ibang winless teams na Iran, Jordan at Korea na magkaroon ng tsansa bilang pinakamagaling na Asian team sa 32-team World Cup.
Bagama’t blanko rin sa world meet ay swak na sa Olympics ang Japan bilang host country na mag-iiwan sa China, Iran, Jordan at Pilipinas sa eksplosibong sabong para sa huling upuan sa Olympics.
Mapupunta sa kanya-kanyang grupo ang ibang Asian teams, habang ang Gilas ay sa Group N kasama ang Angola, Iran at Tunisia.
Dahil carry-over ang format, magmamartsa sa classification ang Gilas Pilipinas hawak ang 0-3 baraha at kakailanganing maipanalo ang lahat ng laban upang magkaroon ng pag-asa sa Best Asian Team at ang hangaring Olympic ticket.
Huling makapaglaro ang mga Pinoy sa Olympics noong 1972 sa Munich kung saan sila nagtapos sa ika-13 puwesto.
