Naka-iskor si Evasco (Sabong News)
Author
ARANGKADA
Date
MAY 11 2017
Ang Bol-anon nga sinaligan ni Presidente Rodrigo Duterte, si Cabinet Secretary Jun Evasco, maoy nakabentaha sa labing uwahing hugna sa lalis mahitungod sa importasyon sa bugas humay: Giaprobahan sa gabinete sa tigom karong semanaha nga giduma ni Duterte ang importasyon pinaagi sa pribadong sektor.
Sukwahi ni sa baruganan ni Administrador Jason Aquino sa National Food Authority (NFA), nga gikatahong nagsalig sa iyang koneksiyon ni Presidential Assistant Bong Go ug Davao City Vice Mayor Paolo Duterte, nga gobyerno ang moduma sa importasyon. Sukwahi sab sa baruganan ni Agriculture Secretary Manny Piñol nga way importasyon.
* * *
Apan lahi sa sibaw nga pagpalagpot ni Duterte sa sinaligan ni Evasco nga si kanhi Undersecretary Halmen Valdez, hilom kaayo ang desisyon sa gabinete pabor ni Evasco. Gani, di si Evasco ang nipahibawo sa iyang kadaogan.
Kon dili si Trade Secretary Ramon Lopez. Kinsa niingon nga gihukasan nang NFA sa monopoliya sa pag-import sa bugas humay. Nipasabot si Lopez nga mas suhito ang pribadong mga negosyante sa industriya sa bugas, mas nahibawo sila kanus-a gikinahanglan ang importasyon ug unsa kadaghan ang paliton.
* * *
Ang labing lig-ong argumento nga nakakumbinser ni Duterte sa pagdapig ni Evasco mao ang dakong utang sa NFA, sa labing uwahing ihap niabot na P200 bilyones, tungod sa direktang pagpamalit og bugas humay gikan sa ubang kanasuran.
Sa government-to-government nga importasyon taas ang presyo sa pagpalit ug barato ang pagbaligya kay di man makahimo ang NFA pakig-ambas sa mas taas nga presyo sa commercial rice. Sa pribadong importasyon, gawas nga di makagasto ang gobyerno makakolekta pa g’yud og buhis nga 35% sa kinatibuk-ang transaksiyon.
* * *
Di hinuon hingpit ang kadaogan ni Evasco. Nagpabilin sa NFA si Aquino nga iyang gihulagway’ng di takos sa iyang trabaho pagsegurong may igong suplay sa bugas pangandam sa katalagman o kalit nga pagsulbong sa presyo.
Usa ka adlaw human gipahibawo ang desisyon sa gabinete, nideklarar si Piñol nga padayong supakon ang importasyon sa bugas humay kay nagbaha nang daan ang importasyon sa trigo ug mais. Nipasidaan pa gani pagbungkag sa rice cartel nga gipasanginlang naningkamot pagpalagpot niya sa katungdanan. Wa igdungog si Duterte nga mobaraw dayon sa sabong sa iyang mga sinaligan.
