Ang Babae sa Silong (66) (Sabong News)
Author
Ronnie M. Halos
Date
MARCH 13 2021
SAGLIT lang na tinapunan ng tingin ni Dado ang matandang lalaki na tiyak niyang papa ni Gab. Baka mapansin ng matanda na tinitingnan niya at kung ano ang isipin. Nagpatuloy si Dado sa paglalakad hanggang makalabas sa apartment.
Habang naglalakad patungo sa sakayan ng jeepney sa España Blvd. naalala niya ang mga sinabi ni Gab ukol sa father nito. Kaya raw madalas ang pagpunta kay Gab ay dahil humihingi ng pera at ang katwiran ay pambili ng gamot para sa rayuma at pananakit ng likod. Pero nalaman ni Gab sa bunsong kapatid na nahuhumaling daw sa sugal – karera, sabong at majong.
Habang ikinukuwento ni Gab ang tungkol sa iresponsableng ama ay napansin niya ang pag-uunahan ng mga luha nito sa pag-agos sa pisngi, Sa totoo lang, gusto na rin niyang mapaluha dahil sa ikinuwento ni Gab. Napigilan lang niya. Pero talagang naaawa siya kay Gab. Kawawa naman ang babaing sa pakiramdam ni Dado ay puro sugat na ang balikat sa dami nang pinapasang responsibilidad.
Bakit kaya may ama na iresponsable na katulad ng kay Gab? Hindi na ito nagtanda sa mga nagawang kasalanan na matapos mambabae at iwan ang pamilya ay muli na namang gumagawa ng mali. Hindi na ito naawa kay Gab.
Naikumpara tuloy ni Dado ang papa ni Gab sa kanya namang tatay na namayapa na. Napakabait at napaka-responsible ng kanyang tatay. Wala siyang masasabi sa kanyang tatay na napakabait at napaka-ulirang asawa. Wala sa kalingkingan ang papa ni Gab.
Maski nang makasakay na sa jeepney si Dado ay si Gab pa rin ang nasa isip niya. At naalala niya: Bakit kaya itinanong ni Gab kung may siyota na siya?
Hindi na lang niya ito nasagot dahil tinawagan ng kapatid. Kapag nagkausap sila uli, sasabihin niya na wala siyang siyota. (Itutuloy)
