PCSO, may P1-B prize money sa palaro nito! – Garma (Sabong News)
Author
DIPUGA
Date
JULY 07 2021
MAY P1 bilyon na pondo para sa prize money ng kanilang gaming products ang Philippine Charity Sweepstakes Office kaya hindi dapat mabahala ang kanilang parukyano kung daang milyones ang pinakawalan nila sa sunud-sunod na nanalo ng jackpot prize noong Hunyo, ani PCSO General Manager Royina Garma.
Lima ang naging milyonaryo noong nakaraang buwan kaya nanawagan si Garma na suportahan pa ang kanilang palaro at lakihan ang taya para malaki rin ang tsansa na manalo. Sinabi ni Garma na hindi dapat mag-alinlangan sa pagtangkilik sa lotto at hindi maubusan ng pondo ang PCSO kahit daang milyones pa ang inilabas sa kanilang kaha sa sunud-sunod na nanalo sa palaro nila noog Hunyo.
Ayon kay Garma, dapat matuwa ang mga Pinoy dahil marami ang naging milyonaryo sa lotto kaya hinimok niya na tumaya sa mga gaming products nila at hindi sa mga ilegal na palaro, tulad ng lotteng at jueteng ni alyas Renel sa Caloocan City. Iginiit ni Garma na sa PCSO, milyones ang premyo samantalang sa ilegal na pasugalan, halos ganun na rin ang taya subalit sobrang hirap namang manalo. ‘Ika nga ginagawa ng mga ilegal na palaro na palabigasan ang mga Pinoy. Dipugaaaaaa!
Ang mga nanalo sa lotto draw ng PCSO noong Hunyo ay taga-Laguna na kumubra ng P54.4 milyon; taga-Samar sa P49.5 milyon; sa taga-Nueva Ecija sa P15.4 milyon; P29.7 milyon sa taga-Baguio City at sa taga-Rizal naman ay P10 milyon. Hehehe! Kung sumahin lahat ang nawala sa kaban ng PCSO, aba sisiw ito sa kanilang P1 bilyon pondo para sa prize money, di ba mga kosa?
Kaya dapat ang tamang laro lang ang tatangkilikin ng mga Pinoy o ‘yaong tinatawag na “laro ng puso” dahil kapag malaki ang makakalap na pondo ng PCSO, aba maraming mahihirap na Pinoy, maging nakatira sa mga bundok o isla, ang makikinabang sa charity programs nila, ang dagdag pa ni Garma. Mismoooo! Dipugaaaaa!
Inamin ni Garma na naapektuhan ng pandemya ang sales nila subalit hindi naging hadlang ito para tugunan ng PCSO ang mandatory contributions nila sa ilang ahensiya ng gobyerno na partner nila sa nation building. Kasama si Juliet Aseo, ang assistant general manager ng PCSO for Charity Sector, pinamahagi ni Garma ang mga shares ng kanilang mga partners na may kabuuang halaga na P35.39 milyon.
Tumanggap ang representante ng National Bureau of Investigation (NBI) ng P6.2 milyon; Philippine National Police (PNP) P15.7 milyon; Commission on Higher Education P18.4 milyon; Girls Scouts of the Philippines P278,420; Philippine Sports Commission P74,549; at Philippine Red Cross P767,110.
Noong Hunyo naman, nagpalabas ng P227 milyon na tulong ang PCSO sa 28,000 maralita. Kasama nina Garma at Aseo, na humarap sa media sina Atty. Lauro Patiag, ng AGM sa Branch Operation Sector at Noel Casas ng Finance. Nagpaliwanag naman sila tungkol sa STL operations ng PCSO at ang iba pang natulungan nilang ahensiya ng gobyerno. Dipugaaaaa!
Maaring maapektuhan konti ng inaprubahan na apat na palarong e-sabong ang sales nila subalit makabawi naman sila bunga sa may go signal na si President Digong para sa online betting platform ng PCSO. Dipugaaaaa! Abangan!
